A Deputación mellorará a seguranza viaria do cruzamento da EP-7001 coa rúa Francisco Filgueira, na entrada a Forcarei

O deputado de Mobilidade, Uxío Benítez, que visitou hoxe a intersección acompañado pola alcaldesa, asegurou que o orzamento ascende a 68.995,16 euros

A Deputación de Pontevedra vai mellorar a intersección da EP-7001 coa rúa Francisco Filgueira, na entrada ao núcleo urbano de Forcarei. Segundo explicou hoxe o deputado de Mobilidade, Uxío Benítez, quen visitou o lugar da actuación coa rexedora, Belén Cachafeiro, "esta actuación foi unha das peticións prioritarias que manifestou a alcaldesa e que agora imos resolver, porque actuar nos puntos onde é preciso máis seguranza viaria na rede provincial é unha das nosas prioridades e eixos estratéxicos de actuación".

O deputado indicou que a actuación de Forcarei está integrada nun Plan xeral de mellora de interseccións nas vías provinciais, no que están incluídas outras obras en concellos coma Pazos de Borbén, O Porriño, Salceda de Caselas ou Marín, entre outros. "As interseccións son puntos perigosos nos que hai riscos de accidentes e seguranza viaria. Nos vindeiros anos seguiremos abordándoas en función das problemáticas detectadas polos nosos técnicos e dos problemas que nos plantexen os concellos", dixo.

No caso de Forcarei, segundo subliñou Benítez, a forma que ten actualmente a intersección coa outra vía existente -case en perpendicular-, dificulta en gran medida o acceso á estrada provincial, sobre todo a vehículos de grandes dimensións. As obras proxectadas consistirán na ampliación do radio de xiro do cruzamento na entrada á rúa Francisco Filgueira desde o norte, o que implica a creación dun carril de espera para o tráfico procedente do sur da EP-7001, a modificación da beirarrúa, a reposición dos servizos que pasan por debaixo da beirarrúa e a creación dun muro de sostemento de cachotaría, xa que existe un gran desnivel entre o nivel da estrada e o terreo natural dos predios adxacentes.

Obras no verán

As obras teñen un orzamento de 68.995,16 euros, ao que haberá que engadir o custo das expropiacións necesarias. Segundo explicou Benítez, o proxecto aprobouse por unanimidade inicialmente no pleno de novembro para iniciar o proceso de expropiación, xa que finalizou o proceso aberto de información pública. "Estamos na fase de resolución das alegacións. Queriamos que fose no mes de marzo, pero seguramente será no pleno de abril cando procederemos á aprobación definitiva. A nosa idea é adxudicar antes do verán para poder facer as obras durante o verán", explicou.

A actuación comezarase coa limpeza e roza da zona de construción. Ademais, demolerase o tramo de beirarrúa da zona na que se vai colocar o novo carril e fresarase a parte do firme afectado. Executarase a cementación, un muro de cachotaría e un recheo coidando de acadar unha boa compactación para evitar futuros "blandóns" e afundimentos. Así mesmo, colocaranse novos servizos, todos eles conectados ás instalacións existentes de pluviais, abastecemento e iluminación pública. No tocante á iluminación, de feito, colocarase a canalización necesaria para dar servizo a dúas novas luminarias de 10 m de altura, con luminarias LED de 80 W, que se van colocar na parte interior da nova curva.

No que atinxe á seguridade e sinalización, na entrada ao núcleo de Forcarei colocarase un paso de peóns sobreelevado (PPS) con todas as características propias dos instalados no plan Móvese e pintaranse as marcas viarias necesarias. Na zona sueste ampliarase o illote pintado arredor da farola das luminarias e trasladarase o carril de baixada uns metros á dereita, eliminando as prazas de aparcamento do lado este para conseguir un cruzamento máis directo e seguro para os vehículos que baixan desde o cuartel ou o cemiterio.

Pintados

Ademais de anunciar as obras da nova intersección, Benítez anunciou tamén a Cachafeiro o inminente pintado da totalidade da EP-7001, que une Forcarei coa Estrada (de 21,550 quilómetros de lonxitude), para mellorar a visibilidade da estrada, que se ve moi reducida en días de néboa. Por este motivo, así mesmo, estudiarase a instalación dos coñecidos como "ollos de gato", dispositivos reflectantes que delimitan as marxes das vías.

Por outra banda, tamén se confirmou que durante esta primavera se pintaran outras tres estradas provinciais no concello: a EP-7201, entre Cachafeiro-Silleda, a EP-7203, Soutelo-Covas, e a EP-7204, Soutelo-Ratel. Estas tres vías representarán un total de 100 quilómetros de pintado e un investimento de 40.943,886 euros.

A previsión é que estes pintados se finalicen antes do inicio do verán.