A Deputación saca a contratación a mellora do cruce da EP-7001 coa rúa Francisco Filgueira en Forcarei
O deputado de Mobilidade Uxío Benítez indica que o prazo de presentación de ofertas finaliza o vindeiro 24 de outubro
A Deputación de Pontevedra acaba de anunciar oficialmente no Boletín Oficial da Provincia (BOPPO) a contratación das obras de mellora da intersección da EP-7001 coa rúa Francisco Filgueira na entrada ao núcleo urbano de Forcarei. O prazo de presentación das ofertas finaliza o vindeiro 24 de outubro, e a adxudicación realizarase mediante procedemento aberto.
O orzamento global da actuación é de 76.611,51 euros, dos que 68.995,16 euros están previstos para a realización dos traballos e a cifra restante para as expropiacións de terreo para ampliar o cruce. Nos criterios de adxudicación do contrato avaliaranse o programa e equipa de traballo, o plan de control de calidade, a memoria e o plan de actuacións ambientais, se ben o prezo ofertado suporá para as empresas unha puntuación máxima do 55 % do total.
Segundo explica o deputado de Mobilidade Uxío Benítez, a renovación deste cruce entre a vía provincial e a rúa Francisco Filgueira en Forcarei foi unha petición do Concello que encaixa "nas prioridades e eixes estratéxicos da Deputación de mellora da seguranza viaria nas estradas provinciais". De feito, a institución provincial ten en marcha un plan xeral de mellora de interseccións para eliminar puntos de sinistralidade na rede viaria propia.
No caso de Forcarei, a estrada provincial EP-7001 entre A Estrada e Forcarei crúzase coa outra vía existente case en perpendicular, o que dificulta en grande medida o acceso. As obras proxectadas ampliarán o radio de xiro na entrada da rúa Francisco Filgueira desde o norte, creando un carril de espera para o tráfico provinte do sur pola EP-7001. Tamén se renovará a beirarrúa, repoñeranse os servizos que discorren por debaixo da beirarrúa (pluviais, abastecemento e alumeado), crearase un muro de sostemento de cachotería para salvar o grande desnivel entre a estrada e as parcelas adxacentes, e instalaranse dúas novas luminarias led de 10 metros de altura na parte interior da curva.
Así mesmo, na entrada ao núcleo de Forcarei colocarase un paso de peóns sobreelevado (PPS) con todas as características propias dos instalados ao abeiro do Plan MÓVESE e pintaranse as marcas viarias necesarias. Por outra parte, na zona sueste ampliarase o illote pintado arredor das luminarias e trasladarase o carril de baixada uns metros á dereita, eliminando as prazas de aparcamento para acadar un paso máis directo e seguro para os vehículos que baixan desde o cuartel ou o cemiterio.
