A Deputación de Pontevedra destina a Portas tres novas achegas do Plan Concellos por máis de 62.000 euros
Financiarase o subministro de equipamentos para parques infantís e o saneamento de augas residuais e pluviais en Xagobe-Vilavedra
A Deputación de Pontevedra acaba de aprobar, mediante unha Resolución presidencial, tres novos investimentos no concello de Portas ao abeiro de Plan Concellos por un total de 62.258,10 euros. Trátase de tres axudas, das que 30.435,58 euros irán destinados ao saneamento de augas residuais en Xagobe-Vilavedra; 25.855,36 ao saneamento, tamén en Xagobe-Vilavedra, de augas pluviais; e os restantes 5.965,16 ao subministro de equipamento para parques infantís.
Ademais desta cantidade, o Goberno provincial a través do Plan Concellos xa adxudicou anteriormente varias axudas para o municipio. En concreto, 167.000,96 euros na liña 1 destinados a financiar o subministro de equipamento urbano, a pavimentación en Xagobe-Vilavedra, Rapeira e Outeiro e, tamén, para o saneamento de augas residuais en Romai Vello e Outeiriño. No que corresponde á liña 2, a Deputación adxudicou 36.040,74 euros para a amortización da débeda do concello. Tamén, 85.596,77 euros foron destinados á financiación da contratación de traballadoras e traballadores, dentro da liña 3 do Plan Concellos 2018.
A Deputación destina este ano a Portas, ao través do Plan Concellos, un total de 648.353,74 euros, un 74,61 % máis que en 2017.
