A Deputación de Pontevedra abre unha segunda convocatoria de préstamos sen xuros para os concellos de menos de 50.000 habitantes
A institución provincial destinará máis de 600.000 euros, que se suman aos 1,5 millóns de euros concedidos na primeira convocatoria deste ano
A Xunta de Goberno da Deputación de Pontevedra acaba de aprobar as bases para a concesión, por concorrencia competitiva, dunha segunda convocatoria dos préstamos sen xuros para os concellos de menos de 50.000 habitantes da provincia correspondentes ao exercicio de 2017. Deste xeito, a institución provincial investirá 620.000 euros, que se suman aos outros 1.500.000 euros que a Deputación de Pontevedra xa aprobou este ano na primeira convocatoria da caixa de anticipos, é dicir, un total de máis de 2 millóns de euros (2.120.000 €) de investimento.
Grazas a estas achegas, os concellos de menos de 50.000 habitantes poden facer fronte á execución de diversos investimentos, ou tamén, de forma excepcional, regular a concesión de préstamos para o financiamento de operacións de tesourería cos que afrontar necesidades urxentes ou desfases transitorios.
Os concellos que queiran beneficiarse desta liña de axudas terán un prazo de 20 días naturais a partir do día seguinte ao da publicación do extracto da convocatoria no Boletín Oficial da Provincia de Pontevedra.
Na primeira convocatoria de 2017 a Deputación de Pontevedra concedeu máis de 1,1 millóns de euros para os concellos de Arbo (30.047,76 €), Catoira (400.000 €), Fornelos de Montes (49.500 €), A Lama (124.527,15 €), Poio (136.321,55 €) e Ponteareas (400.000 €). Concedió un total de 1.140.396,46 €, cos que a institución provincial permitiu que estes concellos puidesen financiar iniciativas relacionadas coa construción de edificios e a subministración de materiais, co fin de garantir os servizos públicos, levar a cabo proxectos de impulso da accesibilidade universal ou mellorar as instalacións municipais, entre outras.
Desde o ano pasado, por primeira vez, esta liña de préstamos non ten ningún tipo de xuros, ao contrario do que acontecía co anterior Goberno, cando os intereses se situaban no 2 %. O Goberno provincial liderado por Carmela Silva decidiu suprimir eses xuros co fin de contribuír a mellorar a situación que están a vivir os concellos da provincia de Pontevedra.
