54 persoas de Cuntis visitarán a Illa de San Simón e o castelo de Soutomaior co programa "En ruta coa Depo"
A iniciativa da Deputación de Pontevedra serve para que veciñas e veciños da provincia realicen visitas guiadas a lugares de especial interese e cun alto valor turístico
O programa "En ruta coa Depo" organiza este domingo 19 de agosto, unha nova excursión na que participarán 54 veciñas e veciños do concello de Cuntis, concretamente da Asociación de Mulleres "Ardefur". A actividade consistirá nunha ruta na que poderán coñecer a Illa de San Simón, o Museo Meirande, o castelo de Soutomaior e Ponte Sampaio.
"En ruta coa Depo" ten por obxectivo mellorar a participación, a convivencia e a cohesión social dos distintos colectivos sociais da provincia , promovendo a igualdade de oportunidades para os colectivos con diversidade funcional, que antes non podían participar, así como ofrecer alternativas de ocio e tempo de lecer á poboación xuvenil da nosa provincia e promocionar rutas destinadas ás entidades de nais e pais que fomenten a convivencia e o intercambio de experiencias nas que participen activamente as nenas e nenos. O contido do programa consiste en pasar un día de convivencia pola provincia, mediante acompañamento dun ou dunha guía que conte coa habilitación de guía de turismo especializado de Galicia e inclúe xantar e transporte.
No 2017 participaron na iniciativa "En ruta coa Depo" 17.501 persoas pertencentes a 410 entidades da provincia. Para este 2018 foron adxudicadas en total 19.814 prazas, 2.313 máis que o ano anterior.
