"A-tragoad-a" de Stephy Llaryora pecha cun chamamento á loita contra a violencia machista a vi edición de "Mulleres En Acción. Violencia Zero"
Tras máis de 100 actuacións desde 2015, o programa provincial despide en Soutomaior a súa VI edición ante o alumnado de 3º da ESO do Colexio Santiago Apóstol
As diferentes fases polas que pasa unha relación de violencia machista, xunto coa música e a danza, foron as grandes protagonistas da performance de Stephy Llaryora hoxe en Soutomaior. No marco da clausura da VI edición do programa provincial "Mulleres en Acción. Violencia Zero", a artista fixo con "A-tragoad-a" un chamamento claro e emotivo á loita contra a violencia de xénero física e psicolóxica. Tras máis de 100 actuacións pola provincia desde o seu inicio en 2015, a Deputación despide, un ano máis, o seu programa emblema do seu compromiso pola igualdade. A actuación foi seguida en directo polo alumnado de terceiro da ESO do Colexio Santiago Apóstol, así como pola deputada de Igualdade, Victoria Alonso, e a concelleira de Igualdade de Soutomaior, Cristina González.
A acción escénica de Llayora, estreada en "Violencia Zero", consistiu nunha peza de movemento expresivo, próxima á danza contemporánea, na que a artista fixo partícipes aos e ás asistentes das diferentes fases polas que pasa unha relación desde que comeza ata que, no peor dos casos, a muller morre física ou psicoloxicamente. A artista baseouse, para representalas, no significado de 12 palabras: "conexión", "sedución", "paixón", "convencer", "illamento", "culpar", "manipular", "escapar", "recaer", "denigrar", "dominar" e destruír". Representando cada unha delas unha fase, Stephy Llaryora acompañou a súa definición, pronunciada por diferentes mulleres do panorama artístico e da súa contorna (entre as que se atopa a súa propia nai), das súas danzas interpretadas no interior dun acuario transparente. A performance remata coa artista baixo unha tea que cobre o acuario, símbolo da súa propia morte física ou psicolóxica.
"A-tragoad-a" fai visible á mocidade unha realidade palpable no seu día a día. Invítaa á reflexión e amosa os diferentes estadios polos que pasa unha relación tóxica para pola alerta ante este tipo de situacións. Trátase dunha acción que pon de relevo a violencia machista no seu estado máis atroz, pero tamén no menos visible, que leva a moitas mulleres á ansiedade e á depresión. Para a súa creación a artista empregou un total de 12 pezas musicais, todas elas de artistas españolas, como Travis Birds ou Allice Wonder, e de moi variados xéneros musicais. A peza, cuxa duración abrangueu preto de 20 minutos, rematou cun pequeno coloquio no que Stephy Llaryora falou do seu proceso de creación e interactuou cos e coas asistentes sobre a dificultade de saír das relacións de violencia e dos problemas cos que se atopan as vítimas pola falta de comprensión da sociedade.
Esta foi a última acción levada a cabo dentro da VI edición do programa, que este ano ten como lema "Emerxencia cultural, urxencia feminista! Nin un paso atrás na loita contra a igualdade". "Mulleres en Acción. Violencia Zero" ten por obxectivo darlle visibilidade á loita contra as violencias machistas, así como dar a coñecer o labor de novas artistas que están a traballar a prol da igualdade. Amais, a "nova normalidade" na que se desenvolveu esta edición propiciou que o proxecto incorporase novos soportes na acción transversal a favor da igualdade, que se materializaron en máscaras con creatividades feministas deseñadas por Lara Lars, Gemma Marqués e Laura Romero. O programa provincial continuará a súa andadura este mesmo mes, dando comezo a unha nova edición que volverá contar con 25 accións de visibilización que invitan á reflexión sobre a violencia.
