Vilagarcía acolle desde mañá a mostra "Mulleres en acción: Violencia zero" impulsada pola Deputación
A exposición ten por obxectivo reivindicar a igualdade de xénero e poñer o foco de atención na problemática da violencia machista
A Presidenta da Deputación de Pontevedra, Carmela Silva, acompañada do alcalde de Vilagarcía, Alberto Varela, inaugurará mañá, ás 12:00 na casa do concello, a exposición itinerante impulsada pola institución provincial "Mulleres en acción: Violencia Zero", que ata finais de mes poderá verse en Vilagarcía.
A mostra recolle os resultados da acción artística contemporánea do proxecto, desenvolvido simultaneamente o pasado 25 de novembro, Día Internacional contra a Violencia de Xénero, por artistas galegas en 10 concellos da provincia (Pontevedra, Vigo, Vilagarcía de Arousa, Cangas, Redondela, Lalín, Tui, Tomiño, Moaña e Caldas de Reis).
O obxectivo da exposición é fomentar entre a cidadanía unha actitude crítica fronte á violencia machista, buscando ademais unha implicación real na loita contra esta lacra, que este ano xa provocou a morte de 27 mulleres en toda España, unha delas en Galicia, e 16 menores orfos. Dende o organismo provincial, e a través desta mostra e doutras iniciativas, preténdese ademais insistir na necesidade de comezar esta loita contra a violencia de xénero entre as xeracións máis novas.
Carmen Nogueira, Ana Gesto, Adriana Pazos, Iria Acevedo, Rosa Neutro, Ánxela Blanco, Mónica Mura, Neves Seara, Laura Piñeiro, Mery Pais e Paulova foron as encargadas de darlle corpo a "Mulleres en acción: Violencia Zero", con diferentes recreacións artísticas o pasado 25N. Todas elas son novas artistas galegas, polo que a través desta iniciativa tamén se visualiza o seu traballo, achegando así a arte contemporánea ás rúas a través do diálogo con todos os públicos e incentivando ao mesmo tempo a integración de mulleres e homes na loita contra a violencia machista.
Adriana Pazos e Iria Acevedo foron as artistas que o 25 de novembro presentaron a súa performance "Cogombros en vinagre" en Vilagarcía. Na súa acción buscaban amosar as complicacións que se chegan a dar no mundo en parella e o abismo de xénero existente, que fai agromar a lacra da violencia machista.
"Mulleres en acción. Violencia Zero" está a percorrer os concellos nos que se desenvolveu o proxecto para reivindicar a igualdade de xénero e poñer o foco de atención na actual problemática da violencia machista. A exposición, que xa se mostrou nos concellos de Pontevedra, Tomiño, Lalín, Tui, Caldas e Redondela, poderase ver en Vilagarcía a partir de mañá e ata finais de agosto. En setembro chegará a Cangas, en outubro a Moaña e, finalmente, en novembro ao concello de Vigo.