Uxío Benítez anuncia 1,7 millóns de euros para a mellora de 2.577 quilómetros de sinalización horizontal nas vías provinciais
O deputado de Mobilidade explicou que o obxectivo é garantir a seguranza viaria e "solventar un déficit histórico" polo mal estado de conservación da rede viaria
O deputado provincial de Mobilidade, Uxío Benítez, anunciou hoxe un investimento de 1,7 millóns de euros para a mellora de 2.577 quilómetros de sinalización horizontal nas vías provinciais. En total actuarase en 226 estradas, o que supón case as tres cuartas partes do total da rede de vías de titularidade provincial. A mellora, segundo dixo o nacionalista, enmárcase na nova filosofía do departamento de Mobilidade da Deputación que aposta pola mobilidade sustentable na que a seguranza viaria é un eixo clave.
Benítez destacou que a seguranza viaria é unha "preocupación principal" para o novo goberno da Deputación. "Hoxe lanzamos esta actuación que pretende unha sinalización horizontal integral de toda a rede viaria provincial en lugar de actuar pouco a pouco con actuacións pequenas. Queremos asegurar a visibilidade nocturna e diurna e separar os espazos para os vehículos e os peóns para garantir unha convivencia de mobilidades en toda a rede viaria", explicou.
O plan porase en marcha agora logo de meses de traballo por parte dos técnicos provinciais de conservación e de analizar as necesidades. Segundo Benítez, "dende que chegamos ao goberno analizamos o estado de situación das estradas provinciais e detectamos un mal estado de conservación que viña de hai tempo. No relativo á sinalización horizontal os propios técnicos da Deputación tiñan manifestado que había un déficit histórico que había que solventar".
O deputado insistiu, así, en que os criterios de selección das estradas nas que actuar foi decidido logo dun traballo "serio e rigoroso" para priorizar as actuacións máis urxentes. "Serán cuestións técnicas e non políticas ou partidistas como ata agora as que marquen os lugares nos que actuar. Non se farán melloras pola petición do alcalde de ‘turno'"
Benítez explicou que quedaron fóra do plan de sinalización algunhas vías asfaltadas recentemente e tamén outras nas que o novo departamento de Mobilidade prevé actuar de maneira inminente ou a corto prazo con reformas integrais de maior calado. Algúns exemplos son a estrada que vai á igrexa de San Vicente ( O Grove) ou a estrada Concepción Arenal (A Guarda).
Estradas listas no verán
O obxectivo do plan de sinalización horizontal é que en toda a provincia se pinten as vías (liñas lonxitudinais, aparcamentos, illotes, cebreados, pasos de peóns) que nunca tiveron marcas viarias e se renove o pintado naquelas nas que polo paso do tempo e o uso xa estean desgastadas. A actuación prevese comezar tan pronto como as condicións meteorolóxicas o permitan e, en calquera caso, na primavera do próximo ano, para que as estradas estean en "estado de revista" ao chegar o verán.
Esta semana aprobarase a licitación do plan, que se divide en catro lotes territoriais. Esta división permitirá facilitar o acceso ao contrato a empresas de menor tamaño e tamén poder executar os pintados de forma paralela e, por tanto, máis áxil.
Finalmente, Benítez destacou que esta primeira fase de mellora da sinalización horizontal terá continuación nos vindeiros anos do mandato para así dar cobertura á totalidade das estradas provinciais.
Actuacións
O primeiro lote que se saca a licitación é o das comarcas de Pontevedra, Caldas e O Salnés, que suman 771,8 quilómetros de pintado e supoñen un gasto inicial de (orzamento de licitación) 516.018,49 euros. Actuarase en 71 estradas provinciais.
Na comarca de Pontevedra pintaranse 332.8 quilómetros en 25 estradas. No Concello de Pontevedra renovarase a sinalización horizontal de 120 quilómetros (sete estradas), 46,5 en Ponte Caldelas (catro estradas), 45,6 en A Lama (tres estradas), 83 en Cotobade (seis estradas), 26,2 en Barro (catro estradas) e 11,2 en Poio (unha estrada).
Na comarca de Caldas pintaranse 245,4 quilómetros de liñas de sinalización horizontal que corresponden a24 vías: catro estradas en Caldas de Reis (68,134 quilómetros), unha en Portas (0,96 qm.), tres en Moraña (32,8 qm.) cinco en Campo Lameiro (58,9 quilómetros), catro en Cuntis (34,63 qm.), tres en Valga (33,32 qm.), unha en Pontecesures (1,83 qm.) e tres en Catoira (14,86 qm.).
Na comarca do Salnés o plan de mellora da sinalización horizontal suporá o pintado de 193,6 quilómetros de sinalización horizontal en 22 vías. O concello de Cambados verá pintadas catro estradas provinciais (21,8 qm), o de o Grove unha (5,8 qm.), o de Sanxenxo cinco (50,8 qm), dous o de Meaño (26,8 qm.), catro o de Meis (63,7 qm.), tres o de Ribadumia (12 qm.), unha o de Vilagarcía (4,9 qm.) e dúas a Illa de Arousa (7,8 qm.).
O segundo lote a licitar é o formado polas estradas de Baixo Miño, Condado e Paradanta, cun total de 46 estradas, 353, 4 quilómetros e un orzamento de licitación de 315.333,59 euros.
Na comarca do Baixo Miño pintaranse 141,8 quilómetros de trazado, dos que 31,5 son en Tui (catro estradas), 74,2 en Tomiño, 0,5 en Oia (unha estada) e 35,6 en O Rosal (tres estradas).
Na comarca do Condado o orzamento das actuacións ascende a 74,807,39 euros e permitirá a renovación da sinalización en 45,1 quilómetros de catro estradas provinciais en Ponteareas, de outras tres en Salvaterra do Miño (9,5 quilómetros), catro en As Neves (44,9 quilómetros), seis en Mondariz (99,3 quilómetros), e 12,8 quilómetros en dúas estradas de Mondariz Balneario.
Na comarca da Paradanta melloraranse 167 quilómetros de pintados en catro estradas en cada un dos concellos de A Cañiza (93,7 quilómetros), Covelo (34,8), Arbo (24,4) e outras tres estradas en Crecente (14,1 quilómetros).
O terceiro lote é o das estradas da comarca de Vigo e de O Morrazo. Supón o pintado de 66 estradas e un total de 488 quilómetros, cun custe inicial de 379.860,76 euros.
Na comarca de Vigo renovaranse 372,2 quilómetros de sinalización horizontal de 49 estradas cun orzamento de 206.545,31 euros, sendo 37,5 quilómetros no Concello de Vigo (catro vías), 31,2 en Nigrán (cinco vías), 33,8 en Baiona (catro vías), 20,7 en Gondomar (tres vías), 20,4 en O Porriño (dúas vías), 36,9 en Salceda de Caselas (catro vías), 48,1 no Concello de Mos (catro vías), 35,8 en Pazos de Borbén (cinco vías), 15,7 en Fornelos de Montes (tres vías), 47,9 en Redondela (oito vías) e 44,3 en Soutomaior (dúas vías).
Na comarca do Morrazo o pintado horizontal chegará a 115,8 q1uilómetros de lonxitude e a 17 vías, sendo 32,5 quilómetros no Concello de Cangas (cinco estradas), 11,9 en Moaña (unha estrada), 29,7 en Marín (cinco estradas)e 41,8 en Bueu (seis estradas).
O cuarto lote é o das estradas das comarcas de Deza e Tabeirós-Terra de Montes. Supón o pintado de 44 vías e dunha superficie loxintudinal de 797,2 quilómetros, cun orzamento de saída de 494.063,23 euros.
Na comarca do Deza pintaranse 407 quilómetros de sinalizacións horizontais en 27 vías, das que 109,6 quilómetros serán en Lalín (cinco estradas), 74,1 en Dozón (tres estradas), 47 en Rodeiro (tres estradas), 33,4 en A Golada (dúas estradas), 36,9 en Vila de Cruces (tres estradas) e 106 en Silleda (once estradas).
Na comarca de Tabeirós e Terra de Montes sitúase o concello con máis estradas e lonxitude pintada de toda a provincia: A Estrada, que verá pintados 241,7 quilómetros de sinalización horizontal en 11 vías de titularidade da Deputación. En total, na comarca actuarase en 390,2 quilómetros e en 44 vías. No resto de municipios a lonxitude restante na que se actuará será en tres estradas en Cerdedo (48,5 quilómetros) e outras tres en Forcarei (100 quilómetros).
