Preto de 900 persoas participan durante esta fin de semana nas excursións do programa "En ruta coa Depo"
Veciñas e veciños de 12 concellos da provincia de Pontevedra realizan visitas guiadas a lugares e monumentos de especial interese e cun alto valor turístico
O programa "En ruta coa Depo" organiza esta fin de semana 16 novas excursións nas que participan 878 persoas de 12 concellos da provincia. Estas excursións permitirán ás persoas participantes coñecer novos lugares da provincia de Pontevedra.
Máis polo miúdo, 54 persoas de Asociación Cultural Villalonga, visitarán o Castro de Santa Trega, na Guarda; Espazo Fortaleza, en Goián (Tomiño); conxunto histórico, monte Aloia e Alto dos Cubos, en Tui.
Pola súa banda, 34 persoas pertencentes a Down Xuntos Pontevedra, coñecerán Lalín: Centro Castrodeza, Museo Municipal Ramón María Aller, pazo de Liñares, Museo Galego da Marioneta e Casa do Patrón.
Tamén, 196 persoas da Asociación de Pensionistas e Xubilados Santa Teresa da Cañiza, da Asociación Santa Clara de Ancorados, da Asociación Andaina e da Asociación Fibromiño, farán a ruta por Arousa: Illa da Toxa, gozarán dun paseo en barco pola ría de Arousa (con degustación). E tamén van visitar O Grove, Museo da Salga e paseo pola zona, e xacemento da Lanzada.
Por outra banda, 162 persoas pertencentes á Asociación de Mulleres Rurais Os Borrizos e á Asociación de Mulleres Rurais Anduriña de Sobradelo poderán visitar o Santuario de Santa María da Franqueira, na Cañiza; Centro de Interpretación da Cera (Favum) e Casa-Museo Pazo da Cruz, en Covelo.
No caso da Asociación Cultural Amigos da Música de Mougas, 54 persoas coñecerán o Parque de Natureza do Río Barosa, en Barro; Parque Arqueolóxico de Arte Rupestre, en Campo Lameiro; fervenzas de Raxoi e Pedrafita, área recreativa e praia fluvial de Ponte Valga, en Valga.
Outras 108 persoas da Asociación de Mulleres Rurais Chan dos Casteliños e da Asociación Monteira Danzas do Mundo visitarán o Parque da Natureza do Río Barosa, en Barro; antiga azucreira, miradoiro do val do Umia e a exposición sobre Domingo Fontán, en Portas; xacemento da Igrexa Vella de Santa Comba de Louro, en Valga; Torres de Oeste, en Catoira.
Tamén 54 persoas da Asociación de Mulleres e Familia do Ámbito Rural Fragas do Tea farán a súa ruta pola Comarca de Pontevedra: Mosteiro de Poio; igrexa de Augas Santas e fonte medicinal, en Cerdedo-Cotobade; praia fluvial, en Ponte Caldelas
Pola súa banda, 54 persoas da Asociación de Veciños San Juan de Meaño van coñecer o conxunto histórico de Cangas, igrexa do Hío, miradoiro da costa de Soavela e Cabo Home, Cabo Udra e Museo Massó, en Bueu.
No que respecta á Asociación Veciñal Mallodoiro de Nerga, 54 persoas visitarán o conxunto histórico de Salvaterra de Miño e parque da Canuda; Centro de Interpretación do Viño e da Lamprea (Arabo) e pesqueiras do Miño, en Arbo.
Outras 54 persoas da Asociación de Mulleres Rurais San Miguel de Cora fará a súa ruta por Meis: mosteiro da Armenteira, Ruta da Pedra e da Auga, muiños do Batán, monte do Castro e pazo de Señoráns.
E xa por último, 54 persoas da Asociación de Mulleres Rurais Santa Catalina Portonovo coñecerán San Simón: illa de San Simón, Museo Meirande, Redondela, castelo de Soutomaior e Ponte Sampaio.
"En ruta coa Depo" ten por obxectivo mellorar a participación, a convivencia e a cohesión social dos distintos colectivos sociais da provincia , promovendo a igualdade de oportunidades para os colectivos con diversidade funcional, que antes non podían participar, así como ofrecer alternativas de ocio e tempo de lecer á poboación xuvenil da nosa provincia e promocionar rutas destinadas ás entidades de nais e pais que fomenten a convivencia e o intercambio de experiencias nas que participen activamente os nenos e nenas. O contido do programa consiste en pasar un día de convivencia pola provincia, mediante acompañamento dun guía que conte coa habilitación de guía de turismo especializado de Galicia e inclúe xantar e transporte.
No 2017 participaron na iniciativa "En ruta coa Depo" 17.501 persoas pertencentes a 410 entidades da provincia. Para este 2018 xa foron adxudicadas en total 21.812 prazas, 4.311 máis que o ano anterior.
