Preto de 1.000 persoas participarán durante esta fin de semana nas excursións do programa "En ruta coa Depo"
Veciñas e veciños de 11 concellos da provincia de Pontevedra realizarán visitas guiadas a lugares e monumentos de especial interese e cun alto valor turístico
O programa "En ruta coa Depo" organiza esta fin de semana 16 novas excursións na que participan 972 persoas de 11 concellos da provincia de Pontevedra.
Máis polo miúdo, 170 persoas da Asociación de Mulleres Rurais Val da Louriña, do Centro Sociocomunitario de Tui e da Asociación de Xubilados e Pensionistas "Alfonso Daniel Castelao" farán unha ruta por Cambados, na que poderán visitar o Museo Etnográfico e do Viño, ruínas de Santa Mariña Dozo, conxunto histórico de Cambados, adega do pazo de Fefiñáns (con degustación) e Museo Muiño de Mareas da Seca.
Pola súa banda, 110 persoas pertencentes á Asociación Cultural Alvedosa e á Asociación Cultural Deportiva Cidadelle visitarán o conxunto histórico de Cuntis (praza das Árbores, Casa Grande dos Castro...), miradoiro do parque de Maráns, castro de Castrolandín e o conxunto histórico de Caldas de Reis( fonte das Burgas, ponte romana, xardín botánico e carballeira).
Tamén, 54 persoas da Asociación de Mulleres Progresistas de Darbo poderán coñecer o conxunto histórico de Salvaterra de Miño e parque da Canuda; Centro de Interpretación do Viño e da Lamprea (Arabo) e pesqueiras do Miño, en Arbo.
Por outra banda, 110 persoas da Asociación do Antigo Alumnado de Don Bosco María Auxiliadora e da Asociación Mulleres Rurais "A Chanciña" visitarán o conxunto histórico de Cangas, igrexa do Hío, miradoiro da costa de Soavela e Cabo Home; Cabo Udra e Museo Massó, en Bueu.
Tamén, 54 persoas da Asociación Bolymar farán a ruta polo Santuario de Santa María da Franqueira, na Cañiza; polo Centro de Interpretación da Cera (Favum) e pola Casa-Museo Pazo da Cruz, en Covelo.
Outras 170 persoas pertencentes á Asociación Cultural Virxe da Luz de Castelans, á Casa Cultural de Bugarin e á Asociación Veciñal Terra da Laxe de Pintens coñecerán a Illa da Toxa, gozarán dun paseo en barco pola ría de Arousa (con degustación), O Grove, Museo da Salga e paseo pola zona, e xacemento da Lanzada.
No caso da Asociación Coral Rosalía de Castro, 54 persoas poderán visitar a illa de San Simón, Museo Meirande, Redondela, castelo de Soutomaior e Ponte Sampaio.
A ruta pola comarca de Pontevedra vai ser realizada por 54 persoas da Asociación de Representantes do Comercio, nela coñecerán o mosteiro de Poio; igrexa de Augasantas e fonte medicinal, en Cerdedo-Cotobade, e a praia fluvial, en Ponte Caldelas.
Tamén, 54 persoas da Asociación Mulleres Rurais Os Pazos, visitarán o castelo de Sobroso; Mondariz-Balneario; petróglifos de Gargamala, en Mondariz, e castro de Troña, en Ponteareas.
Por último, 110 persoas da Agrupación Cultural A Cividade poderán coñecer o Parque da Natureza do Río Barosa, en Barro; o Parque Arqueolóxico de Arte Rupestre, en Campo Lameiro; as fervenzas de Raxoi e Pedrafita, área recreativa e praia fluvial de Ponte Valga, en Valga.
"En ruta coa Depo" ten por obxectivo mellorar a participación, a convivencia e a cohesión social dos distintos colectivos sociais da provincia , promovendo a igualdade de oportunidades para os colectivos con diversidade funcional, que antes non podían participar, así como ofrecer alternativas de ocio e tempo de lecer á poboación xuvenil da nosa provincia e promocionar rutas destinadas ás entidades de nais e pais que fomenten a convivencia e o intercambio de experiencias nas que participen activamente os nenos e nenas. O contido do programa consiste en pasar un día de convivencia pola provincia, mediante acompañamento dun guía que conte coa habilitación de guía de turismo especializado de Galicia e inclúe xantar e transporte.
No 2017 participaron na iniciativa "En ruta coa Depo" 17.501 persoas pertencentes a 410 entidades da provincia. Para este 2018 foron adxudicadas en total 19.814 prazas, 2.313 máis que o ano anterior.
