Máis de 640 persoas participan durante esta fin de semana nas excursións do programa "En ruta coa Depo"
Veciñas e veciños de 11 concellos da provincia de Pontevedra realizan visitas guiadas a lugares e monumentos de especial interese e cun alto valor turístico
O programa "En ruta coa Depo" organiza esta fin de semana 11 novas excursións na que participan 648 persoas de 11 concellos da provincia. Estas excursións permitirán ás persoas participantes coñecer novos lugares da provincia de Pontevedra.
Máis polo miúdo, 54 persoas da Asociación Cultural O Rubal da Picoña achegaranse ata Meis, onde poderán gozar do mosteiro da Armenteira, da Ruta da Pedra e da Auga, dos muíños do Batán, o monte do Castro e pazo de Señoráns.
Pola súa banda, 54 persoas pertencentes á Asociación de Mulleres Rurais de Castro poderán coñecer o castro de Santa Trega, na Guarda; Espazo Fortaleza, en Goián (Tomiño); conxunto histórico, monte Aloia e Alto dos Cubos, en Tui.
Tamén, 54 persoas da Asociación Mulleres Rurais A Pícara visitarán o conxunto histórico de Cangas, igrexa do Hío, miradoiro da costa de Soavela e Cabo Home; Cabo Udra e Museo Massó, en Bueu.
Por outra banda, 54 persoas do Club de Xubilados e Pensionistas de Portonovo farán a ruta polo Parque de Natureza do Río Barosa, en Barro; antiga azucreira, miradoiro do val de Umia e exposición sobre Domingo Fontán, en Portas; xacemento da Igrexa Vella de Santa Comba de Louro, en Valga; e Torres de Oeste, en Catoira.
Tamén, 162 persoas pertencentes á Asociación Rede de Mulleres Veciñais contra os Malos Tratos de Vigo, Asociación de Mulleres Rurais San Vicente de Paúl e a ANPA Pintor Antonio Fernández, poderán visitar a illa de San Simón, o Museo Meirande, Redondela, o castelo de Soutomaior e Ponte Sampaio.
Pola súa banda, 108 persoas da Asociación de Mulleres Rurais e Culturais Santa Mariña e da Asociación de Mulleres de Muimenta, coñecerán a Illa de Ons e a localidade mariñeira de Portonovo.
Tamén, 108 persoas da Asociación de Nais e Pais A Oliveira farán a súa ruta por Arousa, nesta ruta marítima gozarán da Illa da Toxa, darán un paseo en barco pola ría de Arousa (con degustación), O Grove, Museo da Salga e paseo pola zona, e xacemento da Lanzada.
E xa por último, 54 persoas da Asociación de Maiores Contamos, coñecerán Cambados, Cidade Europea do Viño: Museo Etnográfico e do Viño, ruínas de Santa Mariña de Dozo, conxunto histórico de Cambados, adega do pazo de Fefiñáns (con degustación) e Museo Muíño de Mareas da Seca.
"En ruta coa Depo" ten por obxectivo mellorar a participación, a convivencia e a cohesión social dos distintos colectivos sociais da provincia , promovendo a igualdade de oportunidades para os colectivos con diversidade funcional, que antes non podían participar, así como ofrecer alternativas de ocio e tempo de lecer á poboación xuvenil da nosa provincia e promocionar rutas destinadas ás entidades de nais e pais que fomenten a convivencia e o intercambio de experiencias nas que participen activamente as nenos e nenos. O contido do programa consiste en pasar un día de convivencia pola provincia, mediante acompañamento dun guía que conte coa habilitación de guía de turismo especializado de Galicia e inclúe xantar e transporte.
No 2017 participaron na iniciativa "En ruta coa Depo" 17.501 persoas pertencentes a 410 entidades da provincia. Para este 2018 foron adxudicadas en total 19.814 prazas, 2.313 máis que o ano anterior.
