O Plan Concellos achega 8000 € a Ponte Caldelas para un anteproxecto de eficiencia enerxética no alumeado
No que vai de ano o goberno provincial leva investido na vila 154.415,04 €, algo máis do 31% do total adxudicado a Ponte Caldelas no marco do Plan Concellos 2016
A Deputación de Pontevedra, mediante resolución presidencial, vén de aprobar unha achega de 7.996,51 euros para o concello de Ponte Caldelas, ao abeiro da liña 1 –investimentos– do Plan Concellos 2016. Estes case 8.000 € serán destinados á elaboración dun anteproxecto de eficiencia enerxética no alumeado público, concretamente no paseo da Calzada.
Ademais desta cantidade, o Plan Concellos 2016 xa adxudicou anteriormente varias axudas para o concello da comarca de Pontevedra. En concreto, 17.669 € destinados ao pagamento de gastos correntes (liña 2), outros 18.613,45 € na liña 3 para sufragar unha actuación das Festas das Dores e, por último, 110.106,08 € destinados á contratación de 14 traballadoras e traballadores que están a desempeñar funcións no concello, dentro da liña 4 destinado ao emprego.
Nesta primeira fase do exercicio, a Deputación provincial leva investidos na vila 154.415,04 euros, un investimento do 31,1% sobre o total adxudicado a Ponte Caldelas dentro do Plan Concellos 2016.
