O Goberno de Carmela Silva destina preto de 80.000 euros a Vilagarcía de Arousa ao abeiro do Plan Concellos 2017
A institución provincial leva entregado o 88,44 % do total destinado a Vilagarcía de Arousa dentro do plan, isto é máis dun millón de euros
A Deputación de Pontevedra aprobou por Resolución presidencial dúas novas achegas ao Concello de Vilagarcía de Arousa, no marco do Plan Concellos 2017, dentro da súa liña 1 de Investimentos. Nesta ocasión, a institución provincial, presidida por Carmela Silva, achegará 50.000 euros para a instalación dunha pista multideportiva no barrio dos Duráns e 37.583,76 euros para levar a cabo a demolición da estrutura de formigón na rúa Almirante Fontán de Vilaxoán.
Ao abeiro do Plan Concellos 2017, anteriormente a institución provincial xa destinara a Vilagarcía de Arousa outros 655.273,16 € na liña 1 para a subministración dunha cisterna de rego de emulsión asfáltica, unha mini pala cargadora, unha máquina trituradora, un vehículo pick up, unha máquina porta féretros e unha máquina sinalizadora, así como para a humanización da praza de Galicia e un tramo de padre Feijóo, para a instalación dun ascensor no edificio do centro de emerxencias da vila e para a renovación de varandas no entorno de Vista Alegre. Á marxe da liña 1, a Deputación de Pontevedra tamén aprobou destinar a Vilanova de Arousa outros 178.332,97 € para a reparación de farois nas rúas Castelao, Edelmiro Trillo, no contorno da Alameda e na praza Ravella; para a intervención con familias en situación de emerxencia social; para gasto corrente novo; para tecnoloxías emerxentes e o servizo de mantemento dos parques infantís; para o pintado da gardería infantil municipal; para o combate naval e os programas Sarsale, Activa o Corpo e a Mente, e de sensibilización en igualdade. Ademais, o Goberno de Carmela Silva destinou xa a Vilagarcía de Arousa outros 314.331,47 €, da liña 3 do Plan Concellos 2017, para a contratación de 34 persoas para garantir a correcta prestación dos servizos municipais no concello.
Coa suma desta nova achega, Vilagarcía de Arousa xa ten recibido da Deputación de Pontevedra o 88,44 % do total do investimento que lle corresponde dentro do Plan Concellos 2017, isto é, 1.235.521,36 € dun total de 1.397.028,74 €.
