O Goberno de Carmela Silva destina a Marín unha nova achega por valor de preto de 300.000 euros ao abeiro do Plan Concellos 2018
Marín recibiu xa o 22,9 % de 1.771.000 euros que a Deputación de Pontevedra pon este ano á súa disposición no marco do Plan provincial
A Xunta de Goberno da Deputación de Pontevedra aprobou unha nova achega para Marín ao abeiro da liña 1, de Investimentos, do Plan Concellos 2018-2019. Con este investimento, Marín recibirá 299.695,67 euros para realizar obras de acondicionamento no recinto das piscinas municipais.
Anteriormente, a Deputación de Pontevedra xa aprobara unha achega ao Concello de Marín, dentro da liña 3 de Emprego do Plan Concellos 2018-2019, de 106.004,16 euros para contratar a 16 traballadores. En total, Marín xa recibiu 405.699,83 euros.
A presidenta da Deputación de Pontevedra, Carmela Silva, sinalou que "con esta nova achega, Marín xa recibiu da Deputación de Pontevedra o 22,9 % do total do investimento que lle corresponde dentro do Plan Concellos 2018-2019, que este ano pon a disposición da localidade 1.771.748,31 euros, un 72,49 % máis que en 2017".
