O Goberno de Carmela Silva destina 60.000 € a Cangas para adecuar os seus parques infantís á normativa
A Xunta de Goberno da institución provincial aprobou hoxe axudas valoradas en preto de 350.000 euros para os concellos de Cangas, Marín e Redondela
A Xunta de Goberno da Deputación de Pontevedra vén de aprobar a concesión de axudas por valor de preto de 350.000 € para que tres concellos da provincia poidan acometer novos investimentos nos seus termos municipais. En concreto, benefícianse destas achegas da liña 1 (investimentos) do "Plan Concellos 2017" as vilas de Cangas, Marín e Redondela. Grazas a estes investimentos, estas tres vilas poderán levar a cabo melloras nos seus espazos, infraestruturas e instalacións públicas.
No que corresponde ao concello de Cangas, a vila do Morrazo recibirá a cantidade de 60.477,63 euros co obxectivo de financiar as actuacións que permitirán que os parques infantís da vila se adecúan á normativa vixente. En concreto, veranse beneficiados parques como o do Señal, o da Estación de Autobuses, o do barrio de Nazaret, o de Socotelo, o de Aldán, o de Vilariño e o da Caína. Ata o momento, Cangas ten aprobado xa o 91,4% do orzamento que a Deputación de Pontevedra lle destina no marco do "Plan Concellos 2017", isto é, unha achega valorada en 995.202 euros dos preto de 1.100.000 € que lle corresponden neste exercicio.
A Presidenta Carmela Silva subliñou que "coas axudas que aprobamos hoxe, que ascenden a 350.000 €, levamos xa distribuídos máis de 20,6 millóns de euros, é dicir, o 80,3% da liña 1 que, como saben, este ano ten un orzamento de 25.750.000 €". A Presidenta da Deputación de Pontevedra manifestou a importancia destas achegas porque "sen elas, os concellos da nosa provincia dificilmente poderían facer fronte ás súas competencias, nin tampouco impulsar novos investimentos ou novos proxectos" e lembrou que "esa é a razón de ser desta institución, a de axudar aos pequenos e medianos concellos para que garantan a calidade de vida das súas veciñanzas".
A Presidenta da Deputación de Pontevedra, Carmela Silva, aproveitou para lembrar que "este ano o Plan Concellos ten unha dotación de 41,2 millóns de euros, unha partida un 3% maior que a aprobada o ano pasado e que, entre as súas tres liñas estratéxicas, leva aprobados xa 32,6 millóns de euros dende xaneiro, é dicir, máis do 79,3% do seu orzamento total".
