O Goberno de Carmela Silva aproba axudas de preto de 215.000 € para os concellos de Cambados e Ribadumia
A través destas axudas, enmarcadas na liña 1 do Plan Concellos 2017, Cambados impulsará a humanización das rúas Ourense e Pontevedra e Ribadumia legalizará as subministracións de electricidade
A Xunta de Goberno da Deputación de Pontevedra acaba de aprobar unha partida de preto de 215.000 euros ao abeiro da liña 1 do Plan Concellos 2017 destinada aos concellos de Cambados e Ribadumia. A presidenta Carmela Silva quixo insistir na importancia destas axudas provinciais que permiten "garantir as mellores condicións e servizos básicos para a cidadanía como é neste caso a humanización de rúas e a legalización da subministración de electricidade".
En concreto, Cambados recibirá 147.712,14 € para a humanización das rúas de Pontevedra e Ourense. Nestes primeiros meses do ano, a institución provincial leva aprobados 493.832,987 € para Cambados no marco do Plan Concellos 2017, é dicir, xa se repartiu un 53,46 % dos 923.739,30 € previstos para a localidade neste ano.
No caso de Ribadumia, as achegas aprobadas ascenden a 67.044,49 € para a legalización das subministracións de electricidade. Neste caso, a Deputación aprobou xa achegas por valor de 169.636,62 € para Ribadumia no marco do Plan Concellos 2017, é dicir, repartiuse o 37,20 % dos 455.965,02 € previstos para o municipio neste ano.
Carmela Silva sinalou que "a liña 1 do Plan Concellos, destinada a investimentos, permite aos núcleos de poboación da nosa provincia levar a cabo investimentos que permiten dotalos de infraestruturas, en moitas ocasións básicas, e garantir a calidade de vida das veciñas e veciños dos concellos da nosa provincia".
As axudas aprobadas ata a data pola Deputación de Pontevedra dentro da liña 1 do Plan Concellos 2017 ascenden a un total de 7.796.592,68 €, isto supón un 30,28 % do destinado a investimentos. Esta é a liña con maior dotación económica do programa e, cun orzamento de 25.750.000 € (fronte aos 25 millóns de 2016) significa o 62,5 % do total do plan.
O Plan Concellos 2017 ten asignado para este curso unha dotación de 41,2 millóns de euros, unha partida un 3 % maior que a aprobada no ano anterior e que entre as súas tres liñas estratéxicas leva aprobado xa máis de 26 millóns de euros
