O castelo de Soutomaior acolle o xoves a xornada da Escola de Igualdade sobre a situación do Pacto de Estado Contra a Violencia de Xénero coas voces máis relevantes do panorama galego e estatal
En 24 horas desde a apertura da inscrición esgotáronse todas as prazas ofertadas para participar nesta actividade da Escola de Igualdade María Vinyals
A presidenta da Deputación de Pontevedra acaba de anunciar que o vindeiro xoves terá lugar no castelo de Soutomaior a xornada anual programada pola Escola de Igualdade María Vinyals da Deputación de Pontevedra, que este ano estará dedicada ao Pacto de Estado Contra a Violencia de Xénero co obxectivo de "achegar o Pacto de Estado á realidade municipal, ás persoas que no ámbito local traballan coas vítimas das violencias machistas".
A presidenta destacou que "as mulleres que participarán na xornada, todas elas moi potentes, realizarán unha análise rigorosa desde o ámbito xurídico, social e sanitario de gran relevancia sobre o Pacto de Estado". Neste eido, as poñentes van afondar nas implicacións da súa aprobación e reflexionar sobre a súa evolución desde diferentes perspectivas, dirixíndose ao persoal da Administración local, ao persoal dos centros de información á muller e a aquelas persoas que traballan na loita pola Igualdade e contra as violencias machistas.
A xornada, que traerá ata o castelo de Soutomaior a mulleres da talla de Ángeles Álvarez, Inmaculada Montalbán, María Luisa Soleto, Gloria Poyatos, Yolanda Domínguez, Rosana Izquierdo e Paz Filgueira, espertou unha grande interese xa que en 24 horas desde o anuncio da apertura da inscrición esgotáronse todas as prazas.
A Escola de Igualdade María Vinyals arrancará a xornada anual ás 9.30 horas coa inauguración oficial. Media hora despois terá lugar a conferencia sobre a xénese, evolución, situación actual e perspectivas do Pacto de Estado a cargo de Ángeles Álvarez, militante feminista que desenvolveu un papel clave na posta en marcha do pacto e tamén para conseguir que o Goberno cumprise a súa promesa de destinar 200 millóns de euros este ano á posta en marcha de medidas contempladas no mesmo.
Ás 12 horas terá lugar a mesa redonda titulada "Pacto de Estado contra a violencia de xénero. Análise desde o ámbito xurídico e social" na que participan Inmaculada Montalbán, maxistrada do Tribunal Superior de Xustiza de Andalucía e ex vogal do Consello Xeral do Poder Xudicial, e María Luisa Soleto, directora da Fundación Mujeres e compoñente do Observatorio Estatal contra a Violencia de Xénero.
Xa pola tarde, a partir das 16 horas, terán lugar os tres obradoiros. Neste eido, haberá un obradoiro titulado "Xulgar con perspectiva de xénero como metodoloxía de impartición da xustiza equitativa", a cargo de Gloria Poyatos, maxistrada do Tribunal Superior de Xustiza de Canarias e presidenta da Asociación de Mulleres Xuristas; outro nomeado "Cambiar as imaxes para cambiar o mundo", impartido por Yolanda Domínguez, artista visual e experta en Comunicación e Xénero; e finalmente "A atención primaria e o seu compromiso ante a violencia de xénero", a cargo de Rosana Izquierdo, médica de atención primaria e responsable do grupo sobre violencia de xénero da Asociación Galega de Medicina Familiar e Comunitaria.
Finalmente, ás 18.30 horas, desenvolverase a clausura da xornada "Pacto de Estado. E agora que?" a cargo de María Paz Filgueira, maxistrada do Xulgado de Violencia sobre a Muller número 1 de Vigo.
A Escola de Igualdade María Vinyals comezou a súa andadura no ano 2016 e converteuse en pioneira en Galicia e nunha das poucas escolas destas características que existen no Estado. No seu primeiro ano, puxéronse en marcha dúas xornadas sobre políticas de igualdade e muller e liderado e, no 2017, organizouse outra sobre violencias machistas, todas elas no castelo de Soutomaior.
