Mosquera: "pronto haberá novidades potentes sobre a rehabilitación dos edificios do Museo"
O vicepresidente afirma que se está a traballar de forma simultánea tanto na mellora das construcións históricas como no novo edificio de Valdecorvos, xa que ambas son prioridades de mandato
O vicepresidente da Deputación, César Mosquera, asegurou hoxe que "pronto haberá novidades potentes" sobre a rehabilitación dos edificios históricos do Museo de Pontevedra no casco vello da cidade. Segundo confirma o nacionalista, estase a traballar de maneira simultánea tanto no proxecto de mellora do Castro de Monteagudo e do García Flórez, como na construción no novo edificio de Valdecorvos destinado a Arqueoloxía, xa que ambas actuacións –xunto coa mellora da xestión interna do Museo– son "prioridades" para este mandato.
Mosquera realizou hoxe estas declaracións ao coñecer a moción presentada polo grupo provincial do PP na que se insta ao Goberno a axilizar a rehabilitación. Segundo o vicepresidente, este escrito o único que deixa ver é a falta de interese do PP por estar ben informado: Lembrou que o pasado 10 de xullo publicamente nos medios de comunicación el mesmo anunciou que se estaba a traballar no deseño do proxecto para tratar de solucionar os moitos problemas estruturais das construcións e dando os pasos burocráticos relacionados con Patrimonio.
"Todos eses problemas, que son moitos, xa están enfocados", afirmou, garantindo que o obxectivo é sacar adiante a rehabilitación tan pronto sexa posible. "Pronto haberá novidades potentes e cando haxa cuestións noticiables faranse públicas. Queremos un resultado bo. A rehabilitación dun edificio é algo complexo, queremos unha obra bonita para os moitos anos que vai dar servizo e estamos vencendo todos os trámites que hai que pasar", indicou.
Mosquera quixo lembrar que o traballo para mellorar o Museo é constante con tres obxectivos claros desde o inicio de mandato –a mellora da xestión, a rehabilitación, e a construción do edificio de Arqueoloxía–. "E os tres están en marcha. Estase traballando en todos", argumentou.
