Máis de 500 mulleres comezan esta semana 30 accións formativas do programa "Conectadas"
Os obradoiros de igualdade da Deputación de Pontevedra serán desenvolvidos en 23 concellos da provincia
O programa da Deputación de Pontevedra "Conectadas" 2019 continúa poñendo en marcha accións formativas dirixidas a apoderar ás mulleres da provincia mediante a formación. Deste xeito, desde este luns, 535 mulleres pertencentes a asociacións de 23 concellos pontevedreses comezan 30 cursos. En liñas xerais, a través desta iniciativa da institución provincial, está previsto que participen 4.000 mulleres de 53 concellos.
Mañá, luns 7 de outubro, dan comezo 16 obradoiros en diferentes partes da provincia. En Caldas de Reis empeza Iniciación á Costura, que contará coa participación de 16 persoas pertencentes á Asociación de Veciños Raigame e que se desenvolverá no Centro Social As Goletas de Saiar, os luns, entre as 18 e as 21 horas ata o 23 de decembro.
Campo Lameiro será escenario da acción formativa Artesanía en Coiro, organizada pola Asociación de Mulleres Rurais A Chanciña e con data de finalización programada para o 7 de xaneiro de 2020. Neste obradoiro, que terá lugar os luns, entre as 17.00 e as 19.30 horas, daranse cita un total de 15 persoas.
Por outra banda, 22 integrantes da Asociación Muíños do Vento, de Catoira, comezarán tamén este luns o curso Ximnasia de Mantemento, que terá lugar no Multiusos de Catoira, os luns e os mércores,entre as 18.15 e as 19.15 horas ata o 29 de xaneiro.
Na Estrada, 17 integrantes da Asociación de Veciños de Frades comezan a acción formativa Mantemento do Fogar e Xestión Doméstica, que será os luns, de 18.00 a 20.30 horas, ata o día de remate do curso, o 13 de xaneiro.
Así, na Guarda, a Asociación de Mulleres Rurais Consumidoras e Culturais Santa Tecla comezará este luns un obradoiro Risoterapia que conta con 19 inscritas e inscritos. Este desenvolverase, os luns e xoves, con horario de 16.30 a 18.30 horas, e rematará o 2 de decembro.
No concello de Meaño tamén comezará unha acción este luns. Baixo o título Conservación de Alimentos, Conservas Artesanais daranse cita 24 integrantes da Asociación de Mulleres Rurais e Consumidoras A Telleira de Dena. Este curso terá lugar os luns, e rematará o 13 de xaneiro do vindeiro ano.
Alfabetización Dixital II: Internet, Correo Electrónico, Manexo da ‘Tablet', Teléfono Intelixente... será un curso que comezará en Meis. Nel participarán un total de 17 persoas da Asociación de Mujeres Rurales Os Pazos. A acción formativa terá lugar, os luns e venres, ás 19.30 e ás 21.30 horas, e a data de finalización está prevista para o 9 de decembro.
Oia, pola súa banda, será o escenario de Risoterapia, un obradoiro no que están inscritas 18 persoas da Asociación de Mulleres Rurais Amurga. Así, este curso desenvolverase os luns, entre as 17 e as 19.30 horas, ata o 13 de xaneiro.
En Ponteareas, 15 integrantes da Asociación Cultural San Mateo gozarán dun obradoiro denominado Pintura, que comezará este luns, e rematará o 23 de decembro. O curso desenvolverase os luns, entre as 17 e as 20 horas, no Salón da Casa Cultural de San Mateo de Oliveira.
15 persoas da Asociación de Mulleres Rurais Os Muíños de Marcón de Pontevedra comezan tamén este luns o obradoiro Alfabetización Dixital II: Internet, Correo Electrónico, Manexo da ‘Tablet', Teléfono Intelixente... na Casa Parroquial de Marcón. Este curso será os luns e venres, entre as 16.30 e as 18.30 horas, e rematará o 9 de decembro. O Centro Cultural de Cedeira, en Redondela, acollerá este mesmo curso con 15 integrantes do Centro Social Cultural Recreativa de Cedeira. Así, este desenvolverase os luns, entre as 19.30 e as 22.00 horas, ata o 23 de decembro.
A Asociación de Mulleres Rurais Salvaterra de Miño Tempo Gañado comeza un obradoiro de Ioga con 16 participantes. A acción formativa, que será no Centro Cultural San Roque os luns, entre as 18 e as 20 horas, rematará o 17 de febreiro do vindeiro ano.
En Soutomaior, a Asociación Veciñal e Cultural de Moreira organiza o obradoiro Coidados DEP II, que conta con 15 persoas matriculadas. Este curso desenvolverase os luns, entre as 16.30 e as 18.30 horas, e rematará o 3 de febreiro de 2020. En Vilagarcía de Arousa, por outro lado, comeza tamén o luns Cociña e Alimentación. Hábitos Saudables da man da Asociación de Mulleres Rurais e Consumidoras de Trabanca Sardiñeira Vilagarcía. O curso, que conta con 24 inscritas, será os luns, de 17 a 19 horas, e finalizará o 23 de decembro.
Finalmente, tamén o luns comezan en Vigo 2 obradoiros. O primeiro, Pilates, que contará coa presenza de 18 integrantes da Asociación de Viúdas Demócratas de Vigo, será os luns e xoves, entre as 17 e as 18 horas, e finalizará o 30 de xaneiro. A Asociación Rede de Mulleres Veciñais Contra os Malos Tratos de Vigo, pola súa banda, organiza Socializándose coas Redes: Facebook, Twitter, Blogs..., un obradoiro que contará con 18 persoas e que se desenvolverá, os luns e mércores, entre as 10 e as 13 horas, ata o 13 de novembro.
O martes, 8 de outubro, pola súa banda, darán comezo sete novas accións formativas cun total de 133 participantes. Deste xeito, en Cambados, 21 integrantes da Asociación Mulleres Rurais de Castrelo As Saiñas comezarán Iniciación ó Patchwork, un curso que se desenvolverá os martes, entre as 19.00 e as 21.30 horas, ata o 21 de xaneiro.
A Asociación Veciñal Santa María de Pazos, en Pazos de Borbén, organiza o obradoiro Ximnasia de Mantemento, que terá lugar no Centro Cultural de Pazos, os martes de 17.00 a 19.30 horas, e finalizará o 25 de febreiro de 2020. Deste modo, o número de persoas que participarán nesta acción ascende a 15.
Ponte Caldelas, pola súa banda, contará cun obradoiro Pilates a cargo da Asociación Mujeres Rurales Aires del Norte y Olé. Nel participarán 25 persoas, que se reunirán, os martes e venres, de 20.30 a 22 horas, ata o 3 de xaneiro. En Pontevedra, ademais, comeza o martes un obradoiro Mindfulness, organizado pola Asociación Española Contra el Cáncer, que conta con 22 persoas inscritas. Deste modo, o curso impartirase os martes e os xoves, entre as 16.30 e as 18.30 horas, e rematará o 17 de decembro.
16 integrantes da Asociación de Mulleres Rurais do Concello de Portas comezan este martes Ximnasia de Mantemento, que terá lugar os martes e xoves, entre as 18.30 e as 20.00 horas, no polideportivo de Romai. Así, a data de finalización desta acción formativa está prevista para o 19 de decembro.
Sanxenxo será tamén escenario dun obradoiro do programa "Conectadas" denominado Cociña e Alimentación. Hábitos Saudables, que contará con 18 integrantes da Asociación Española Contra el Cáncer de Sanxenxo. Esta actividade será os martes de 19 a 22 horas, e rematará o 17 de decembro. Por último, esta acción formativa tamén terá lugar no concello de Vigo da man da Asociación de Mujeres Lúa de Bembrive. Desta forma, en Bembrive as e os 16 participantes deberán acudir ó Centro Sociocultural de Bembrive, os martes de 17 a 20 horas.
O mércores 9 de outubro darán comezo outras dúas accións formativas. En Meis, a Asociación Mulleres Rurais O Marco de San Salvador organiza o obradoiro titulado Conservación de Alimentos, Conservas Artesanais, que se desenvolverá os mércores, entre as 20.30 e as 23.00 horas, con 17 inscritas e inscritos. Con todo, o curso rematará o 15 de xaneiro de 2020. Vigo acollerá o obradoiro Iniciación ó Patchwork, que contará con 15 participantes da Asociación Veciñal Cultural e Deportiva de Lavadores. Este curso terá lugar os mércores, entre as 17 e as 19.30 horas, e rematará o 22 de xaneiro.
O xoves 10, tamén comezarán dous novos cursos. En Lalín, 17 integrantes da Asociación de Veciños Bolarqueiros de Noceda inician o curso Pintura. Así, este obradoiro terá lugar o xoves, entre as 20.00 e as 22.30 horas, e rematará o 9 de xaneiro. A Asociación de Mulleres do Municipio de Silleda, pola súa parte, organiza o curso Cociña e Alimentación. Hábitos Saudables, que contará con 15 participantes e que se desenvolverá os xoves, entre as 20.00 e as 22.30 horas, ata o 2 de xaneiro.
Por último, o día 11 de outubro será o primeiro día para tres novos cursos. No concello de Crecente, 16 persoas da Asociación Veciñal da Parroquia do Freixo participará no obradoiro Bricolaxe e Reparacións no Fogar, que se desenvolverá os venres, entre as 17 e as 20 horas, ata o 11 de decembro, día de finalización da acción formativa.
Vilagarcía de Arousa acollerá o curso Pilates da man da Asociación de Mulleres Rurais e Consumidoras Abelaíña, que terá lugar no local da asociación os venres, entre as 18.30 e as 19.45 horas. Deste xeito, o obradoiro rematará o 24 de xaneiro e contará coa presenza de 16 participantes. Finalmente, tamén en Vilagarcía de Arousa, a Asociación de Mulleres do Rural O Magnolio comezará Cociña e Alimentación. Hábitos Saudables con 15 inscritas. A actividade terá lugar os venres, de 17 a 20 horas, e rematará o 26 de decembro.
"Conectadas" 2019 trátase dun programa provincial que pon o acento na formación, desenvolvendo cursos e obradoiros sobre distintas cuestións para apoderar ás mulleres e dotalas das ferramentas necesarias para construír unha sociedade igualitaria. Ademais, esta iniciativa tamén busca favorecer as relacións interpersoais e intercambio de experiencias, contribuír a mellorar a súa empregabilidade e o seu mantemento no mercado de traballo, así como reducir a brecha dixital. Este programa está dirixido a asociacións, federacións e fundacións sen ánimo de lucro que teñan como obxectivo e ámbito de actuación a promoción das mulleres, o seu desenvolvemento e actuación, o empoderamento feminino e a consecución da igualdade de mulleres e homes.
