Máis de 30 persoas de Vigo e de Vilagarcía de Arousa súmanse aos obradoiros de "Depo en Marcha"
Estes dous cursos permitirán ás persoas maiores da provincia adquirir coñecementos en informática e musicoterapia
Os concellos de Vilagarcía de Arousa e Vigo súmanse esta semana a unha nova entrega dos obradoiros do programa "Depo en Marcha 2017" da Deputación de Pontevedra. Esta acción da institución provincial impartirá, ao longo deste exercicio, un total de 161 cursos para entidades de persoas maiores, xubiladas e pensionistas de 45 concellos da provincia de Pontevedra.
As persoas beneficiarias do Concello de Vilagarcía de Arousa, un total de 20, pertencen á Fundación Asilo Hospitalario Divina Pastora e desenvolverán o obradoiro Musicoterapia os sábados contando desde hoxe 19 de agosto. Con horario de 17:00 a 18:30 horas, a actividade estenderase ata finais de ano e servirá para coñecer as posibilidades que ofrece a música como ferramenta de intervención lúdica, educativa e terapéutica. Ademais, as persoas participantes tamén poderán desenvolver as súas habilidades musicais e, a maiores, aprenderán a empregar a música con fins terapéuticos.
Pola outra banda, 15 persoas da Asociación de Xubiladas e Xubilados e Pensionistas Avoa de Vigo participarán en Informática Avanzada a partir do luns 21, en horario de luns a venres de 16:30 a 18:30 horas ata o vindeiro 8 de setembro. A través del, estas persoas maiores adquirirán coñecementos avanzados de informática e a manexar diversos programas como o Word, o Excel e o PowerPoint. Ao se tratar dun obradoiro de formación avanzada, as persoas participantes xa deben contar cuns coñecementos previos mínimos.
A Deputación de Pontevedra pon en marcha este programa de fomento do envellecemento activo a través de actividades encaixadas en diversas temáticas e que conta cun orzamento de 120.000 euros. Con "Depo en Marcha 2017", a institución provincial busca mellorar a calidade de vida das persoas maiores da provincia de Pontevedra, establecendo relacións sociais e favorecendo a participación en actividades que melloren o seu estado anímico, potenciando movementos de participación e cooperación social, promovendo espazos de encontro e tamén o intercambio de experiencias.
As 8 alternativas de obradoiros que se impartirán nesta ocasión serán "Traballando coas mans": arte con flores, cestería, elaboración de xabóns, iniciación ao encaixe de palillos, restauración de mobles e tapicería e traballos manuais; "Entre fogóns": cociña galega, conservas artesanais, licores caseiros, panadería e repostería e tapiñas e petiscos; "Aprendendo da natureza": plantas medicinais; "Móvete": pilates, ioga, ximnasia de mantemento e zumba; "Activando corpo e mente": conservando a memoria, musicoterapia, risoterapia e control e manexo da ansiedade e o estrés; "Enredando": xogos tradicionais e teatro; "Dálle marcha": bailes de salón, pandeireta e canto popular; e, por último, "En rede": Internet, correo electrónico e manexo do móbil, informática de iniciación e Informática avanzada.
As actividades terán lugar nun total de 45 concellos da provincia: Agolada, Arbo, Barro, Baiona, Bueu, Caldas de Reis, Cambados, Cangas, Cerdedo-Cotobade, Covelo, Cuntis, A Estrada, Forcarei, Fornelos de Montes, Gondomar, O Grove, A Guarda, A Illa de Arousa, Lalín, Marín, Meaño, Moaña, Moraña, Mondariz, Mos, Nigrán, Pazos, Poio, Ponteareas, Ponte Caldelas, Pontevedra, O Porriño, Redondela, Ribadumia, O Rosal, Salceda de Caselas, Sanxenxo, Silleda, Soutomaior, Tomiño, Tui, Valga, Vigo, Vilagarcía de Arousa e Vilanova de Arousa.
