Lalín recibe unha subvención de máis de 60.000 € a través do Plan Concellos 2017 da Deputación para melloras no centro social de Prado
A axuda provincial servirá para a ampliación do local e para dotalo dun sistema de calefacción
A Xunta de Goberno da Deputación de Pontevedra acaba de aprobar unha partida de máis de 60.000 euros para Lalín ao abeiro da liña 1 do Plan Concellos 2017, destinada a investimentos, que servirá para realizar melloras no centro social de Prado. En concreto, a subvención provincial, que ascende a de 61.964,77 €, permitirá realizar a ampliación do centro social desta parroquia e obras de mellora no espazo como a instalación dun sistema de calefacción.
Ata o momento, a institución pontevedresa leva aprobado un total de 399.431,05 € para a localidade no marco do Plan Concellos 2017, é dicir, un 26,33 % do importe total contemplado para Lalín neste ano (1.516.882,35 €).
A presidenta da Deputación de Pontevedra, Carmela Silva sinalou que grazas a estas axudas recibidas a través da liña 1 do Plan Concellos "se garanten servizos básicos para a cidadanía e se lle permite ás vilas e pobos da nosa provincia levar a cabo investimentos que permiten dotalos de infraestruturas, en moitas ocasións básicas, e que melloran a calidade de vida das veciñas e veciños dos concellos da nosa provincia".
No cómputo provincial, a Deputación de Pontevedra leva concedido nos catro primeiros meses do 2017 un total de 5.165.818,69 € ao abeiro da liña 1 do Plan Concellos, é dicir un 20,06 % das axudas a investimentos. Esta é a liña con maior dotación económica do programa e supón o 62,5 % do total do plan, cun orzamento de 25.750.000 € (fronte aos 25 millóns de 2016).
O Plan Concellos 2017 ten asignado para este curso unha dotación de 41,2 millóns de euros, unha partida un 3 % maior que a aprobada no ano anterior e que entre as súas tres liñas estratéxicas leva aprobado un total de 16,3 millóns de euros desde xaneiro.
