Lalín recibe unha achega de máis de 4.000 euros ao abeiro do "Plan Concellos 2017" da Deputación de Pontevedra
A institución provincial leva entregado o 56 % do total destinado a Lalín dentro do plan, cun investimento próximo aos 850.000 euros
A Deputación de Pontevedra acaba de aprobar, a través de sendas resolucións presidenciais, unha nova achega para o Concello de Lalín ao abeiro da liña 1 do "Plan Concellos 2017" de Investimentos. Deste xeito, a institución provincial achegará a cantidade de 4.398,35 euros para a dotación de maquinaria no taller municipal de mecanizado. Concretamente o Concello mercará unha serra de cinta volante de 600 amperes e 380 voltios e unha lixadora con bancada horizontal.
Con anterioridade, Lalín xa recibira outros 280.438,31 euros, tamén na liña 1 de Investimentos, para a ampliación e o sistema de calefacción do edificio do centro social de Prado, para o acondicionamento do paseo fluvial do río Pontiñas, para a pavimentación dunha pista en Froxán e o acceso a Fondevila, para a adquisición de material para uso informático e para a implantación da administración electrónica, para a adquisición dun equipamento de materiais didácticos e, ademais, para o acondicionamento de sala para instalar un ximnasio no edificio multiusos do Lalín Arena. Ademais, 227.532,35 euros en liña 2 para o financiamento de diversas actividades mailo pagamento de gastos correntes e, por último, a cantidade de 337.466,28 euros que permitirán que 37 persoas desenvolvan as súas profesións nos servizos municipais da vila, a través da liña 3 de Emprego do plan.
Grazas a esta nova achega, o Concello de Lalín xa leva aprobado o 56 % do total de investimento que recibe este ano dentro do "Plan Concellos", isto é, 849.835,29 euros dun total de máis de 1.500.000 euros.
