Dozón recibe preto de 50.000 euros do "Plan Concellos 2017" para realizar obras de acondicionamento de camiños
A institución provincial leva entregado o 31 % do total destinado a Dozón dentro do plan, un investimento próximo aos 110.000 euros
A Deputación de Pontevedra acaba de aprobar, a través dunha Resolución presidencial, unha nova achega ao Concello de Dozón ao abeiro da liña 1, Investimentos, do "Plan Concellos 2017". Cun investimento de 49.758,37 euros, o Concello poderá realizar obras de acondicionamento de diversos camiños municipais localizados nos seguintes núcleos de poboación: Fonte dos Tornos, o localizado entre Roirís e Cruz de Paio, o que transcorre entre Rega e Sobrado (en San Martiño), o que vai desde A Lagoa ata Porta do Castro e, finalmente, outro na Lama da Canda.
Con anterioridade, Dozón xa recibira a cantidade de 39.186,66 euros tamén en liña 1 para a reposición do pavimento e a reparación das fochancas da estrada que une Rañestras e Coio Branco e, finalmente, 20.554,91 euros que permitirán que sete persoas desenvolvan as súas profesións nos servizos municipais da vila, a través da liña 3 de Emprego do plan.
Grazas a esta nova achega, a vila de Dozón xa leva aprobado o 30,8 % do total de investimento que recibe dentro do "Plan Concellos 2017", isto é, 109.499,94 euros dun total de máis de 355.000 euros.