Deputación e CSIC achegan a arqueoloxía á cidadanía cun ciclo de charlas que arrancará en centros escolares de Silleda e Forcarei
O IES Chano Piñeiro de Forcarei acollerá o venres 26 a primeira das actividades, á que seguirá o 9 de abril a do IES Pintor Colmeiro de Silleda. Tamén están previstas charlas abertas á cidadanía en Cuntis e Lalín
O apaixonante mundo dos xacementos arqueolóxicos centra o novo ciclo de charlas divulgativas que a Deputación de Pontevedra vai iniciar neste mes de marzo en colaboración co Centro Superior de Investigacións Científicas (CSIC). As actividades, que se enmarcan no convenio de ambas institucións para a investigación e posta en valor como recurso turístico dos castros da provincia, inclúen conferencias abertas á cidadanía e outras máis específicas dirixidas a escolares, coas que precisamente comezará o ciclo o vindeiro día 26 deste mes de marzo.
Deste xeito, o IES Chano Piñeiro de Forcarei acollerá nesa xornada a primeira das charlas, a cargo de Noemí Silva Sánchez, e que levará por título "Como podemos reconstruír as paisaxes do pasado", mentres que o 9 de abril César Parcero-Oubiña falará no IES Pintor Colmeiro de Silleda sobre como "Facer arqueoloxía sen escavar a terra". Noemí Silva é doutora en Bioloxía pola Universidade de Santiago e investigadora do INCIPIT (Instituto de Ciencias do Patrimonio) e o seu ámbito de estudo céntrase na interrelación entre o ser humano e o medio ambiente. César Parcero é doutor en Historia pola USC e científico titular do CSIC, destinado no INCIPIT desde o ano 2006, onde é coordinador da especialidade de tecnoloxías xeoespaciais e participante na especialidade de arqueoloxía.
No caso das charlas abertas á cidadanía, iniciaranse o 17 de abril en Cuntis coa titulada "As persoas habitantes de Castrolandín", que correrá a cargo de Carlos Otero Vilariño e que terá lugar, se as condicións sanitarias e climatolóxicas o permiten, no citado castro.
Otero Vilariño é arqueólogo e colaborador do INCIPIT, cunha ampla experiencia na dirección de importantes actuacións na provincia, entre elas a última escavación realizada en Castrolandín. Ademais é investigador e ten realizado publicacións en revistas científicas sobre arqueoloxía en Galicia e Guinea Ecuatorial. Doutra banda, tamén no vindeiro mes de abril está prevista outra conferencia en Lalín, que versará sobre "O ouro dos castros".
O programa da Deputación e o CSIC tamén contempla, neste caso no ámbito da formación, a realización dun curso Fluorescencia de Raios X no pazo de Liñares, que terá lugar en maio e está dirixido a profesionais do sector. En canto á Semana Internacional da Arqueoloxía, que se conmemorará a finais de xullo, o Centro de Xestión Arqueolóxica do Pazo acollerá o día 28 unha xornada de portas abertas, onde as persoas que o visiten poderán coñecer o laboratorio e os procesos de traballo que alí se desenvolven, así como os materiais investigados.
Intervencións
Estas iniciativas de divulgación e formación complementan as principais liñas de investigación que recolle o convenio entre ambas institucións. Deste xeito, prevese que no mes de abril comecen tamén as tarefas previstas de prospección e escavación con sondaxes nos xacementos arqueolóxicos do Castro de Bendoiro (Lalín), Castrolandín (Cuntis) e Castro Montaz (Silleda). En fases posteriores levarase a cabo un estudo arqueometalúrxico de materiais, así como a elaboración dun plan director sobre a valoración destes recursos desde a perspectiva científica e turística.
