#COVID-19 O plan de acción de "SmartPeme" para fomentar o teletraballo supera todas as expectativas
A Deputación de Pontevedra prioriza o asesoramento sobre ferramentas que facilitan o traballo remoto e desenvolve obradoiros en liña sobre esta temática
A Deputación de Pontevedra puxo en marcha un "plan de continxencia" dentro do programa de asesoramento tecnolóxico "SmartPeme" ante a situación derivada pola COVID-19. A través desta acción estanse a activar iniciativas co obxectivo de fomentar o teletraballo e de reforzar os asesoramentos e a formación a distancia, para así poder seguir prestándolles apoio ás persoas usuarias da rede á vez que se preserva a seguridade do persoal do proxecto. Estas actividades están tendo un grande éxito e superando todas as expectativas, de xeito que xa se chegou aos 43 asesoramentos telemáticos na primeira semana en marcha, prestados a un total de 40 empresas (3 delas nunca empregaran o servizo con anterioridade), e todos os ocos están completos para o primeiro obradoiro en liña (de feito, a alta demanda provocou que houbese que crear unha lista de agarda).
O plan de acción "SmartPeme" baséase en catro eixes, tendo sempre en conta que as medidas poden variar en función da evolución da situación e das decisións que tome o Comité de Seguimento da institución provincial. O primeiro é o reforzo ao asesoramento electrónico e telefónico. Neste eido, cómpre lembrar que "SmartPeme" xa ampliou o abano de posibilidades de asesoramentos telemáticos, incorporando as videochamadas ás consultas telefónicas, ao correo electrónico e ás consultas privadas das súas redes sociais. O persoal de "SmartPeme" potencia os asesoramentos sobre temáticas que afectan as pequenas e medianas empresas e as persoas traballadoras por conta propia ante o coronavirus: as ferramentas de teletraballo, os servizos na nube, o servizo WhatsApp Business, as redes sociais para empresas, o márketing dixital, o comercio electrónico e as plataformas en liña de traballo en equipo, entre outras.
Para poder levar a cabo este traballo, a Deputación de Pontevedra está a dotar o persoal das ferramentas necesarias para poder teletraballar correctamente: ordenador portátil, acceso ao correo electrónico e teléfono móbil, un acceso habilitado ao sistema interno de "SmartPeme" e contas de Skype e Google Hangouts para poder facer asesoramentos por videoconferencia. O equipo de coordinación de "SmartPeme" encargarase da xestión de consultas a través de redes sociais, da atención telefónica do número xenérico do servizo ou da xestión do correo electrónico.
Ante o suspenso das actividades formativas presenciais, a Deputación de Pontevedra desenvolve unha serie de obradoiros que se imparten en liña empregando as ferramentas telemáticas habilitadas para o equipo de asesoras e asesores do programa (en concreto, o programa de formación Moodle). As accións formativas, que contan con 10 prazas cada unha, versan sobre xestión de redes sociais, deseño gráfico, servizos na nube, ferramentas de traballo en equipo, ferramentas de xestión de tarefas, creación de contidos web ou posicionamento en liña. Tamén se aproveitan as circunstancias para revisar os contidos da carteira xeral de obradoiros, para crear novos itinerarios (enfocados principalmente ao comercio e ao sector terciario) e para organizar as actividades que se porán en marcha unha vez se recupere a actividade habitual.
Os cursos en liña programados para esta semana son os seguintes: Como Mellorar o Footer da túa Web, o martes 24; Márketing de Contidos: Aprende a Diferenciarte da Competencia", o mércores 25; Aspectos Legais que toda Páxina Web Debe Ter, o xoves 26; e Promove a túa Empresa a través das Stories de Instagram, o venres 27. Todos eles impartiranse de 12:00 a 13:00 horas, agás o curso do xoves, que se impartirá de 18:00 a 19:00 horas. Para inscribirse só cómpre contactar a través das canles habituais.
En último lugar, estase a efectuar unha ampla difusión do plan de acción enviando un boletín informativo a todos os contactos da rede (non só con contidos relativos a "SmartPeme", senón tamén sobre convocatorias de axudas e información de interese derivada da situación actual), con publicacións nas redes sociais da Deputación e do servizo "SmartPeme", cun banner informativo na páxina web da Deputación e chamando as persoas que xa estiveran inscritas nos obradoiros suspendidos para informalas da nova circunstancia. Esta difusión busca, tamén, aumentar o número de empresas asesoradas. Ademais, publícanse contidos na páxina web de "SmartPeme" relacionados coas ferramentas que facilitan o teletraballo e ofrécese axuda para instalalas.
O equipo de "SmartPeme" xa se puxo en contacto coas empresas asesoradas para realizar un seguimento e seguir impulsando a súa relación a través dos medios telemáticos, clasificándoas con base no grao de necesidade de cada unha para establecer prioridades. As que posúen unha tenda en liña están no nivel máis alto, seguidas das que están actualmente inactivas e precisan reforzar a presenza na rede e, en último lugar, as que acoden para aumentar a súa capacitación.
