#COVID-19 A Deputación establece as novas bases das axudas básicas de emerxencia "para achegar canto antes os recursos aos concellos"
As bases modificadas, que se publicarán no BOPPO o próximo venres, recollen a posibilidade de solicitar o 100 % do importe, tal e como indicou a presidenta provincial na última reunión do Comité de Seguimento
A Deputación de Pontevedra remitiulles hoxe aos concellos de menos de 20.000 habitantes da provincia unha comunicación para informalos de que o próximo venres publicarase no BOPPO a Resolución presidencial de modificación das bases reguladoras das axudas básicas de emerxencia para este ano 2020.
A finalidade da modificación é que os concellos lles poidan solicitar á Deputación o 100 % do importe que lles corresponde para poder atender con maior axilidade orzamentaria as necesidades das persoas máis vulnerables durante o estado de alarma decretado polo COVID-19. Terán prioridade as axudas destinadas a cubrir as necesidades das familias con menores ao seu cargo que se atopen en situación de exclusión social ou en risco de estalo, e inclúense atencións de carácter complementario.
En canto ao prazo de presentación de solicitudes, manterase o prazo establecido nas bases reguladoras, aínda que todas as solicitudes deberán presentarse por medios electrónicos a través do formulario normalizado, dispoñible na sede electrónica da Deputación de Pontevedra (https://sede.depo.gal). Serán válidas as solicitudes presentadas desde o 3 de marzo de 2020. Para a presentación das solicitudes, a sede electrónica da Deputación de Pontevedra admite os certificados electrónicos do sistema Cl@ve, que prevé a utilización de sistemas de identificación baseados en claves concertadas (sistemas de usuario e contrasinal) e certificados electrónicos (incluído o DNIe).
Por outra banda, a Deputación de Pontevedra está a tramitar con urxencia as novas bases do Plan Concertado e do Servizo de Axuda no Fogar (SAF) con vistas a publicalas a próxima semana, e o Goberno provincial está a ultimar unha nova liña de axudas para dotar os concellos de máis recursos a fin de atender as súas demandas sociais.
