#COVID-19 A Deputación anticípalle a Ponte Caldelas máis de 185.000 euros do fondo de liquidez do ORAL para facerlle fronte á pandemia
Mediante este adianto, sen custos para o seu concello, a Deputación anticípalle ao municipio toda a recadación tributaria prevista para este ano
A Deputación de Pontevedra autorizou outorgarlle un anticipo do novo fondo de liquidez do ORAL ao Concello de Ponte Caldelas cun importe de 185.364,84 euros. Trátase da cantidade aproximada que o concello pontevedrés obterá por toda a recadación tributaria deste ano, tomando como referencia a recadación de 2019. A institución provincial adiántalle este diñeiro ao concello a custo cero, a pesar de que o Servizo ORAL, no que Ponte Caldelas ten delegadas as competencias para o cobramento de taxas e tributos, aínda non recadou nada do correspondente a este ano 2020.
O obxectivo desta medida é dotar a vila de máis recursos para que poida así facerlle fronte ás necesidades da súa veciñanza nesta situación de crise sanitaria ocasionada pola COVID-19. De feito, trátase do segundo concello da provincia, despois de Arbo, en acollerse a este fondo do ORAL que a Deputación de Pontevedra puxo en marcha a fin de paliar as demoras de liquidez dos concellos. Con esta iniciativa respéctase a autonomía municipal e se lles dá resposta en menos de 48 horas ás necesidades das vilas e aldeas para que se poidan enfrontar á crise.
A solicitude de Ponte Caldelas chegou este mesmo martes, 31 de marzo, e xa se elaborou a autorización a fin de que mañá mesmo comecen os trámites en Tesourería para ingresar de forma inmediata o anticipo excepcional de taxas e prezos públicos que lle corresponden á vila atendendo ao recadado no 2019, un total de 185.364,84 euros.
O fondo de liquidez do Servizo ORAL forma parte da batería de medidas postas en marcha polo Goberno da Deputación de Pontevedra, a raíz do estado de alarma provocado polo coronavirus, para achegarlles recursos de xeito útil, próximo, rápido e eficaz aos concellos máis pequenos da provincia. Ao fondo do ORAL hai que engadirlle as axudas extraordinarias, a modificación das axudas de emerxencia para poder obter o 100 % desde o primeiro momento, a do Plan de servizos básicos comunitarios e o servizo de axuda no fogar (SAF) e o cambio da liña 2 do Plan Concellos, que os municipios da provincia poden agora destinar á crise sanitaria. Todas estas medidas implican poñer á disposición dos concellos máis de 28 millóns de euros.
