#COVID-19 A Deputación arbitra medidas para apoiar as persoas emprendedoras dos viveiros de Barro e Lalín
A Deputación pon á disposición das 28 empresas viveiristas medidas para aprazar o pagamento do primeiro trimestre e exonerar o tempo de inactividade
O Goberno da Deputación de Pontevedra, a fin de axudar a paliar os efectos da crise xerada pola COVID-19, aprobou novas medidas de apoio ás persoas emprendedoras que actualmente desenvolven as súas actividades empresariais nos viveiros de Barro e Lalín, ocupando un total de 32 espazos entre naves e oficinas.
A Deputación puxo á disposición das 28 empresas viveiristas medidas para facilitar o pagamento dos prezos públicos pola ocupación dos espazos. Así, ofreceulles o aprazamento voluntario ata o 20 de maio do pagamento do aluguer do primeiro trimestre do ano, previsto para este 5 de abril. Ademais, poden acollerse á exoneración do pagamento proporcional ao tempo que as empresas se atopen en situación de inactividade pola restrición da mobilidade aplicada no estado de alarma.
Tras contactar con todas as empresas dos viveiros, 12 das 18 que se atopan paradas optaron polo aprazamento do pagamento ata o día 20 de maio e, ademais, pedirán a exoneración do pagamento do período de cese temporal de actividade. As outras 6 tamén se acollerán á exoneración, pero non ao aprazamento do pagamento do primeiro trimestre, que se liquidará en canto acrediten o tempo de peche, tal e como solicitaron.
As 10 empresas restantes non cesaron a súa actividade e desenvolven o seu traballo con normalidade, ben pola súa consideración de actividade esencial, ben pola posibilidade de adaptación dos seus métodos ao teletraballo. Todas elas decidiron liquidar xa hoxe o pagamento do primeiro trimestre do ano, sen acollerse ao aprazamento, aínda que todas tiñan esa opción.
Esta nova medida da Deputación de Pontevedra únese á batería de actuacións que o Goberno provincial está a tomar con motivo da crise sanitaria, neste caso para apoiar as necesidades básicas destas empresas de emprendemento, axudando así a manter as súas expectativas nos primeiros pasos do seu ciclo de vida e apoiándoas na fase máis crítica para o seu desenvolvemento.
