Carmela Silva e a alcaldesa de Meaño asinan a modificación do convenio de colaboración para o campo de fútbol de céspede sintético da vila
Esta modificación non supón un aumento no investimento achegado pola Deputación de Pontevedra, situado en máis de 150.000 €
A presidenta da Deputación de Pontevedra, Carmela Silva, e a alcaldesa de Meaño, Lourdes Ucha Varela, mantiveron esta mañá no Pazo provincial unha reunión na que asinaron a adenda ao convenio de colaboración entre a institución provincial e a corporación municipal para o campo de fútbol de céspede sintético desta vila.
O convenio foi asinado en xuño do ano pasado, pero durante o procedemento detectouse que o proxecto obxecto deste acordo non contemplaba algunhas unidades de obra necesarias para que o investimento se puidese realizar na súa totalidade. Por este motivo, o concello de Meaño remitiu en abril á institución provincial un novo proxecto coas unidades non previstas, en concreto aquelas referidas á urbanización do acceso ao edificio.
Como consecuencia, tivéronse que modificar as cláusulas primeira (obxecto), segunda (importe) e terceira (financiamento) do convenio, mais sen supor estas modificacións un aumento da contía achegada dende a Deputación de Pontevedra: dos 438.477,36 € iniciais, o importe total sitúase agora en 674.911,17 € e é ao Concello de Meaño a quen lle corresponde esa diferenza orzamentaria, ao pasar dos 283.570,32 € iniciais aos 520.004,13 € actuais. O importe achegado pola institución provincial segue a ser por valor de 154.907,04 €. A Deputación asume a licitación, dirección, execución e recepción das obras definidas no proxecto técnico.
