As xornadas de educacion patrimonial que organiza o Museo chegan a Brasil, Cuba, Arxentina e Chile
O director Xosé Manuel Rei maniféstase "moi satisfeito" coa resposta de público e co alto nivel das persoas relatoras
As primeiras ‘Xornadas de Educación Patrimonial' que organiza o Museo de Pontevedra e a sección de Didáctica das Ciencias Sociais do Grupo de Investigación RODA da USC comezaron hoxe con grande éxito, espertando interese en máis de 200 persoas, entre elas xente que se matriculou e conectou en liña dende países tan afastados como Brasil, Cuba, Arxentina ou Chile, así como o veciño Portugal, atraídos polo alto nivel das persoas relatoras.
O director da institución, Xosé Manuel Rei, manifestou na xornada inaugural a súa grande satisfacción pola alta participación acadada, con máis de 200 persoas seguindo os relatorios, tanto de maneira presencial como en remoto, e tamén polas comunicacións e charlas das diferentes equipas de acción cultural dos principais museos do Estado español.
Están en Pontevedra representantes do Museo de Prado, o Thyssen, o Museo de Cádiz ou a Rede museística de Lugo, as universidades de Santiago, Vigo, Madrid, Valladolid, Murcia , Huelva, País Vasco ou Porto, entre outras entidades, que hoxe relacionaron a educación patrimonial coa Axenda 2030 e afondaron na mediación cultural dos Museos.
Segundo subliñou Rei, as Xornadas de Educación Patrimonial nacen con vontade de permanencia e pretenden converterse nun foto para o intercambio de coñecemento experto e experiencias arredor da educación patrimonial "como mecanismo para promover vínculos e afectos en torno ao noso legado patrimonial, e como instrumento para xerar identidade e sentido de pertenza social".
O comité de coordinación das Xornadas está presidido por José Manuel Rey, director do Museo de Pontevedra, e Belén Castro, da Universidade de Santiago de Compostela. Intervirán, entre outras persoas expertas, Rufino Ferreras (Museo Thyssen-Bornemizsa), Miguel Ángel Cajigal (Museo Gaiás), Encarna Lago (Rede Museística de Lugo), José Antonio Chilía (Museo de Cádiz), Ana Moreno (Museo do Prado), Ana Estévez (Museo do Pobo Galego), Paula Tilve (Museo de Pontevedra), Olaia Fontal (Universidad de Valladolid), Alice Semedo (Universidade de Porto), Marián López Fernández-Cao (Universidad Complutense de Madrid), Cosme Gómez (Universidad de Murcia), Belén Castro (Universidade de Santiago de Compostela), Belén Sola (Universidad de León), Myriam Martín (Universidad de Huelva) e Beatriz Comendador (Universidade de Vigo).
