Areeiro analiza as árbores do parque dos Pasales, en Meaño
A Estación Fitopatolóxica tamén está a aplicar un tratamento fitosanitario para evitar o picudo nas palmeiras dos xardíns de Lourizán
Os técnicos da Estación Fitopatolóxica de Areeiro, dependente da Deputación de Pontevedra, acudiron hoxe ao parque dos Pasales, no concello de Meaño, para analizar as árbores que presentan un mal estado logo da reforma que se fixo este verán na zona. Tomáronse mostras de solo e das propias plantas que se estudarán no laboratorio para realizar unha diagnose. O resultado desas análises estará dispoñible a vindeira semana.
O parque dos Pasales ten dous tipos de árbores de grandes dimensións: plátanos e freixos. Os primeiros presentan un bo estado, pola contra os segundos teñen unha aparencia non saudable. A primeira impresión dos técnicos de Areeiro ante este feito é que non se trata dun problema patolóxico xeneralizado, senón dunha cuestión fisiolóxica propia dos freixos, que coa calor deste verán e a compactación do terreo puideron ter sufrido asfixia. Tras comprobar o seu estado no laboratorio (utilízase normalmente un tree radar e un resistógrafo) poderanse aplicar os tratamentos máis acaídos. Desde Areeiro nunca se recomenda cortar a árbore nin facer unha poda salvo que sexa estritamente preciso.
A Estación Fitopatolóxica de Areeiro realiza, de xeito gratuíto, este tipo de estudo de árbores nos diferentes concellos da provincia, segundo destacou hoxe o vicepresidente, César Mosquera, que eloxiou a profesionalidade dos técnicos provinciais e o seu traballo constante para os gobernos municipais. De feito, acaba de recibirse outra petición do Concello de Cangas para analizar varias árbores moribundas.
Praga de insectos
Por outra banda, na mañá de hoxe os técnicos de Areeiro remataron o tratamento -iniciado o venres- da ducia de palmeiras que crecen no xardín provincial do Centro Forestal de Lourizán (antigo terreo de Montero Ríos) que estaban afectadas por unha praga de picudo. Para loitar contra este insecto realizouse una fumigación cun canón de grandes dimensións (que alcanza os 25 metros de altura e tamén funciona en horizontal), para o que foi preciso o traballo de dous técnicos.
Areeiro tamén se encargará de plantar as árbores das inmediacións do viveiro de empresas do polígono industrial de Barro-Meis. Os exemplares elixidos pertencen á especie Eleagnus umbellata, máis coñecida coma "oliveira de outono"; son uns arbustos de grandes dimensións con froitos vermellos moi saborosos e vistosos. O persoal da Estación Fitopatolóxica visitará o parque nos vindeiros días, cando estea dispoñible a maquinaria provincial para trasladar a terra necesaria.
