Alumnado de Enxeñería Forestal interésase polo Plan Revitaliza de Compostaxe
Estudantado de Xestión Ambiental asistiu a un seminario e coñeceu in situ o funcionamento dos centros de compostaxe comunitaria do campus, no que se tratan entre 30 e 40 toneladas de biorresiduos ao ano
Alumnado da materia de Xestión Ambiental da Facultade de Enxeñería Forestal asistiu hoxe a un seminario sobre o Plan Revitaliza de compostaxe da Deputación de Pontevedra e a unha explicación práctica sobre o funcionamento dos centros de compostaxe comunitaria instalados no campus universitario. O curso de formación correu a cargo da técnica de residuos Mariña Lobelle e das mestras composteiras Paula Santos e Eva Villaverde, que respostaron a moitas das preguntas do estudantado, que se mostrou moi interesado nas características da iniciativa provincial.
Segundo explicou Lobelle, o seminario foi solicitado pola profesora da materia, Xana Álvarez, quen se puxo en contacto co vicerreitor para organizar unha xornada de traballo na que o estudantado puidese coñecer de primeira man o traballo que se está a realizar no campus coa compostaxe dos restos de comida dos dous comedores universitarios, unha cuestión moi relacionada coa programación da materia.
Na xornada de hoxe o alumnado atendeu á explicación da situación actual da xestión dos residuos e da problemática ambiental, económica e social asociada. Tamén coñeceron o contexto legal, que establece que de cara a 2020 a Unión Europea esixe preparar para o reciclado ou a reutilización o 50 % da bolsa do lixo. Lobelle indicou que dado que en Galicia o
53 % dos residuos urbanos municipais son biorresiduos (orgánicos vexetais ou de restos de comidas) é imposible acadar os obxectivos europeos sen buscar alternativas á actual para tratalos. "Non é posible chegar a esas cifras de reciclaxe da UE só abordando o resto das fraccións (papel, vidro, envases), polo que hai que buscar tratamentos alternativos par aos biorresiduos", dixo, para engadir que caben opcións como a aposta da Deputación pola compostaxe, ou ben a dixestión anaerobia como a realizada na planta de Nostián.
En canto ao Plan Revitaliza, Lobelle explicou que a Deputación apostou pola compostaxe e o tratamento a quilómetro cero dos biorresiduos pola grande descentralización da poboación e, por tanto, da producción de lixo municipal na provincia: "a día de hoxe practicamente é mais caro trasladar os residuos desde onde se xeran ata onde se tratan que o propio tratamento en si", indicou. O Plan Revitaliza, engadiu, abarata os custos de transporte e tamén de tratamento, ademais de supoñer unha mellora ambiental ao deixar de emitir o CO2 de queimar os residuos como o de transportalos.
Por outra parte, Lobelle indicou que na provincia de Pontevedra están instalados preto de 60 centros de compostaxe comunitaria (CCC) e que no Concello de Pontevedra hai 17 (12 na cidade e cinco que dan servizo a Príncipe Felipe e o Carlos Oroza). En concreto, explicou a xestión que se fai dos CCC que tratan os orgánicos dos comedores das Facultades de Ciencias Sociais e de Forestais, que tratan entre 30 e 40 toneladas de residuos ao ano –que se deixan de enviar a Sogama–.
Posteriormente á explicación teórica, os e as estudantes, da man das mestras composteiras coñeceron os CCC, o ‘traballo' que deben facer nas cociñas e comedores para separar o lixo orgánico e levalo ao composteiro, e a función que cumpre o persoal técnico do Plan Revitaliza de controlar todo o proceso de compostaxe de xeito continuado vixiando a aireación, a temperatura, o PH, os microorganismos, e todas as fases polas que pasa o material desde que sae da cociña ata que se convirte en compost.