A provincia de Pontevedra, protagonista na serie "O final do Camiño", patrocinada pola Deputación
A serie televisiva, con localizacións en varios escenarios da provincia, estréase hoxe no prime time da TVE e a TVG
A Deputación de Pontevedra, a través de Turismo Rías Baixas, patrocina a serie O final do Camiño, unha produción televisiva que TVE e TVG comezan hoxe a emitir en horario de máxima audiencia. A serie, de oito capítulos, duns 70 minutos de duración cada un, ten como escenario protagonista a provincia de Pontevedra, xa que O final do Camiño se rodou principalmente en localizacións dos concellos de Silleda, Lalín, A Estrada, Forcarei ou Vila de Cruces, nas que se mostra Xestoso, as canteiras de Rosende e Vila de Cruces, os mosteiros de Carboeiro e Aciveiro, a praia fluvial de Siro, o pazo de Outeiro (Vilatuxe), a fervenza de Escuadro, Campomarzo, Ansemil, a carballeira da Barcia ou o castro da Estrada, entre outros lugares. Ademais, empregáronse as instalacións da Feira Internacional de Galicia Abanca, en Silleda, nas que se recrearon a Compostela medieval e as obras de construción da Catedral, cun set de gravación de 2.500 metros cadrados.
O final do Camiño, con doses de loitas de poder, intrigas, historias de amor e desamor, asaltos e batallas, comeza no ano 1065 –dez anos antes do inicio das obras da catedral de Compostela- e vertébrase arredor do Camiño de Santiago. Poderemos ver na serie a actrices e actores coma Antonio Durán "Morris", Fina Calleja, Tito Asorey, Deborah Vukusik, Xavier Deive, Fernando Morán, Carlos Villarino, Manuel Regueiro, Antonio Velázquez, Javier Rey, Maxi Iglesias, Begoña Maestre, Guillermo Barrientos, Cristina Castaño, Asier Etxeandia, Ismael Martínez, Juan Fernández, Joan Massotkleiner, Manuel de Blas, Jaime Olías, Patricia Peñalver ou Paco Manzanedo.
A Deputación de Pontevedra, a través de Turismo Rías Baixas, patrocina esta produción ao considerar que os patrocinios de series de éxito, películas, producións audiovisuais e, en definitiva, da industria cinematográfica, son actualmente ferramentas fundamentais para achegarlles escenarios ás espectadoras e espectadores televisivos e convidalos a coñecelos. Esta é unha estratexia empregada habitualmente por diversos destinos turísticos, especialmente aqueles con maior proxección, que acada excelentes resultados a longo prazo.
O patrocinio de O final do Camiño convértese na primeira das actuacións para a promoción turística de Rías Baixas en 2017, que continuará a vindeira semana en Fitur, tamén centrada no Camiño de Santiago, co obxectivo de abrir novas vías, máis modernas e vangardistas, para destacar as potencialidades da provincia.
