A Illa de Arousa recibe 89.000 € do Plan Concellos para o acondicionamento da Escola de Pau
A Illa de Arousa xa recibiu case o 89% do total destinado dentro do Plan Concellos 2016, o que representa un investimento na vila de 351.782,48 €
A Illa de Arousa recibirá, tal como aprobou a Xunta de Goberno, 89.097,70 € destinados ao acondicionamento da Escola de Pau. Esta achega vén enmarcada dentro de liña 1, investimentos, do Plan Concellos 2016.
Estas axudas súmanse ás xa entregadas ao abeiro do Plan Concellos. En primeiro lugar, na liña 1, 162.803,99 € destinados ao financiamento das obras de pavimentación en Chasán e Testos e á recuperación da Praza do Charco. Por outra banda, 11.400 € na liña 3 para distintas actividades medioambientais, as actividades culturais do Entroido 2016, a elaboración dun rueiro e unha campaña de a prevención da violencia de xénero, e finalmente 88.480,79 €, liña 4, para a contratación de 13 traballadores e traballadoras que están a desempeñar as súas labores para o concello.
Nesta primeira etapa de 2016, xa está asignado o 88,7% dos presupostos destinados á Illa de Arousa ao abeiro do Plan Concellos 2016, acadando un total de 351.782,48 € investidos.
