A exposición sobre o patrimonio arqueolóxico da provincia chega a Cuntis
'Escenarios da Prehistoria para visitar', composta por 37 paneis fotográficos de Federico de la Peña, poderá visitarse na Casa da Cultura ata o 7 de outubro
Trinta e sete paneis fotográficos complementados con debuxos e paneis explicativos amosan a riqueza patrimonial arqueolóxica da provincia de Pontevedra nunha exposición que xa pode visitarse na Casa da Cultura de Cuntis. Baixo o título 'Escenarios da Prehistoria para visitar', a mostra foi aberta esta tarde polo rexedor da localidade, Manuel Campos, polo concelleiro de Cultura, Enrique Portela, e polo comisario e autor das imaxes, Federico de la Peña.
A exposición forma parte das actividades culturais que se programan nos concellos da provincia con motivo do Ano Castelao das Artes que se celebra durante este 2016. A mostra, que percorrerá concellos nos que a pegada arqueolóxica ten unha relevancia manifesta, como é o caso de Cuntis, pretende dar a coñecer o este patrimonio como primeiro paso para fomentar o seu coñecemento entre a veciñanza, e promover que sexa preservado e valorado. 'Escenarios da prehistoria para visitar' entronca, ademais, coa preocupación de Castelao polo patrimonio arqueolóxico e artístico do país. Unha preocupación que tivera o seu reflexo directo no seu álbum 'As cruces de pedra na Galiza', así como nos seus estudos sobre escudos, e na súa participación na 'Sociedad Arqueológica de Pontevedra', dedicada ao estudo e conservación dos elementos do noso patrimonio, así como a música e a poesía popular.
As fotografías da mostra amosan as mámoas, menhires, castros e petróglifos máis senlleiros da provincia, e están complementadas con ilustracións de gran formato que amosan como se construíron eses lugares ou como se tallaron diferentes ferramentas esenciais para a supervivencia daqueles antigos poboadores do noso territorio. Así mesmo, diferentes textos presentes tamén na sala darán resposta ás preguntas mais frecuentes sobre os lugares fotografados. Cada fotografía vai acompañada dunha cartela que indica o nome do elemento arqueolóxico, a súa localización, superficie, a descrición técnica, a súa función e importancia histórica, a data de construción e o estado actual de conservación.
A mostra poderá visitarse na Casa da Cultura de Cuntis, en horario de 16:00 a 21:00 de luns a venres, e de 10:30 a 13:30 os sábados. Antes de chegar a Cuntis, xa estivera en Marín e en Mos, e rematará a súa andaina en A Garda entre o 14 de outubro e o 5 de novembro.
