A deputada de Cohesión Social realiza unha visita ao balneario e Spa do Grove que participan no programa DepoTermal
Digna Rivas quere coñecer de primeira man as opinións das e dos responsables hoteleiros da marcha do proxecto tras dous anos de melloras
A deputada de Cohesión Social e Xuventude, Digna Rivas, iniciou hoxe unha visita ao balneario da Illa da Toxa e Spa da localidade do Grove que participan no programa "DepoTermal" da Deputación de Pontevedra. En concreto, trátase do Hotel Spa Norat O Grove e do Hotel Balneario Eurostars da Illa de Arousa. A deputada percorreou as instalacións dos dous establecementos para coñecer in situ as dependencias e os tratamentos que van recibir as persoas participantes no programa "DepoTermal" a partires do próximo mes de setembro. No Grove estivo acompañada pola concelleira de Obras e Medio Ambiente, Ángeles Domínguez.
Digna Rivas salientou ante as e os responsables dos dous establecementos o seu agradecemento porque un ano máis aposten polo programa "DepoTermal", que volve a contar con máis de catrocentas prazas gratuítas para persoas en risco de exclusión social. A respecto da visita, a deputada provincial, subliñou que se trata de coñecer de primeira man as instalacións das que gozaran as persoas participantes no programa tanto as que optan pola estancia diúrna así como as que pernoitan nas instalacións hoteleiras e tamén de ter un contacto cos propios hoteis e contar coas súas opinións para adaptar "DepoTermal" despois de dous anos de cambios e melloras continuas.
Tanto José Norat, director do Hotel Spa Norat do Grove, como Diana Otero do Eurostar Illa da Toxa, agradeceron a visita da deputada provincial e, sobre todo o seu interese en coñecer as instalacións e recoller as súas opinións sobre o desenvolvemento de "DepoTermal". Así ambos responsables comentaron os seus plans de mellora das instalacións en ambos hoteis nos próximos meses para ampliar, entre outros, os servizos dos spa´s ou ximnasios.
O programa "DepoTermal" pon a disposición das persoas maiores de 50 anos da provincia máis de catro mil prazas para poder participar nun dos programas con máis demanda por parte da cidadanía, e que inclúe 434 prazas gratuítas para persoas en situación ou en risco de exclusión social e sen recursos económicos. Un total de 3.999 persoas de 57 dos 61 concellos da provincia de Pontevedra (todos agás Dozón, Mondariz-Balneario, As Neves e Rodeiro) solicitaron a súa participación en "DepoTermal".
Para poder participar, sempre que estivesen empadroadas nalgún concello da provincia de Pontevedra, as persoas tiñan que ser maiores de 50 anos (ter nacido antes do 1 de xaneiro de 1967) e, no caso de ter nacido con posterioridade, ter a condición de pensionista, un grao de diversidade funcional igual ou superior ao 65 % ou, ademais, precisar dun respiro familiar (coa acreditación conveniente).
A Deputación de Pontevedra destinou este ano 102.000 euros a "DepoTermal" para case catro mil persoas da provincia poidan participar, sendo 434 delas prazas gratuítas, unha novidade que se introduciu a partir da convocatoria de 2016 para persoas en situación ou risco de exclusión social e sen recursos económicos. Estas persoas, ademais, teñen preferencia sobre as demais á hora de establecer o reparto das prazas.
O programa divídese en dúas posibilidades de asistencia, a diúrna (durante cinco días consecutivos, de luns a venres) conta con máis de mil prazas, 248 delas gratuítas e o resto subvencionadas. O programa de estadía en réxime completo inclúe máis de tres mil prazas, 186 delas gratuítas. Esta, ademais da asistencia aos establecementos durante seis días e cinco noites, inclúe un programa de actividades de animación sociocultural.
"Depotermal", que inclúe un total de doce establecementos en toda a provincia, quere fomentar o envellecemento activo e a mellora da calidade de vida das persoas maiores ao facilitarlles a este colectivo que accedan ao turismo de saúde, xa que doutro xeito non poderían beneficiarse da súa dobre función de vacacións e de tratamento sanitario.
