A Deputación pon en marcha este Nadal cinco novos obradoiros do programa "Tecendo lazos"
Preto de 90 persoas de Campo Lameiro, Oia, A Cañiza, Cuntis e A Lama participan nos distintos obradoiros que buscan promover espazos de encontro interxeracionais
Os concellos de Campo Lameiro, Oia, A Cañiza, Cuntis e A Lama acollen nestas datas de Nadal cinco novos obradoiros do programa "Tecendo lazos" 2018, nos que participan preto de 90 veciñas e veciños destes municipios da provincia. O obxectivo desta iniciativa é fomentar un espazo de encontro entre distintas xeracións e que, ao tempo que se aprende dunha temática nova, as persoas participantes, de diferentes idades, poidan intercambiar aprendizaxes, ideas, experiencias e recursos.
"Risa e movemento" é o obradoiro que se desenvolve en Campo Lameiro, no Centro Sociocultural Sobrino Buhigas, entre hoxe e o vindeiro sábado, de 10 a 14 horas. Participan un total de 12 persoas. En Oia ten lugar o obradoiro de "Creación de xoguetes tradicionais", no Centro Cultural de Mougás, desde hoxe 26 ata o 3 de xaneiro. Será os mércores e os xoves, de 10 a 14 horas, con 23 persoas anotadas.
"Risoterapia e Mindfulness" realizarase en Cuntis, desde este 26 de decembro ata o 4 de xaneiro. Será no Centro Patelas, os mércores, xoves e venres, desde as 16 ás 20 horas, e para o que están inscritas 12 persoas. Na Cañiza vaise desenvolver un obradoiro de "Risa e movemento" ata o 3 de xaneiro na Biblioteca Pública os mércores, xoves e venres, de 10 a 14 horas e participarán 18 persoas. Na Lama ten lugar "Xogos de patio", no Multiusos municipal, ata o 4 de xaneiro os mércores, xoves e venres, de 10:15 a 13:45 horas e participan 24 persoas.
En "Tecendo lazos" 2018 participan este ano 38 concellos da provincia. A Deputación de Pontevedra destina para este programa, en 2018, un total de 60.000 euros para o desenvolvemento dos distintos obradoiros. En cada obradoiro poden anotarse persoas de entre 6 e 99 anos de idade, tendo un mínimo de 10 persoas e un máximo de 30, cun mínimo do 40 % de menores. A súa duración é de 16 horas lectivas e axústanse a catro temáticas diferentes: "Risas en familia", "Xogos e xoguetes tradicionais: xogando en familia", "O noso son: bailes e cancións de agora e de sempre" e "Faino ti".
Todos os obradoiros inclúen o módulo "A historia do meu municipio", a través do que as persoas participantes se achegan máis polo miúdo á historia do seu propio concello, recompilando historias, lendas, contos ou fotografías dos mesmos. Cada municipio elaborará un traballo que se presentará a un concurso, que na pasada edición de 2017 gañou o concello da Lama co proxecto "Andando gaña o muíño, que parado está perdido".
Este ano sumáronse 12 concellos máis a esta iniciativa, xa que en 2017 participaron en "Tecendo lazos" 26 municipios da provincia. En concreto, tomaron parte nos distintos obradoiros realizados un total de 534 persoas.