A Deputación inicia os roteiros literarios cun percorrido pola Illa de San Simón centrado na memoria histórica
Trátase dunha iniciativa, en colaboración coa AELG, coa que se pretende dar a coñecer o patrimonio da provincia a través dunha perspectiva literaria
Esta mañá, partían do porto de Meirande os e as participantes no primeiro dos roteiros literarios que a Deputación pon en marcha no marco das actividades do Ano do Patrimonio. Este primeiro percorrido, que levaba por título ‘Roteiro da memoria na Illa de San Simón. De Mendiño a O lapis do carpinteiro', estivo guiado polo crítico e escritor Xosé María Álvarez Cáccamo. Ata o punto de partida do roteiro, achegáronse o deputado de Cultura e Lingua, Xosé Leal, e a escritora e membro da Asociación de Escritoras e Escritores en Lingua Galega, Marta Dacosta, para dar a benvida ás persoas participantes. O deputado nacionalista quixo aproveitar para salientar que "é moi significativo que comezar esta iniciativa cunha visita tan especial á Illa de San Simón, a nosa Illa da Memoria, que nos permitirá percorrer a través da literatura toda a súa historia, facendo fincapé en cuestións como a lírica medieval ou os campos de concentración que houbo durante a guerra e a posguerra".
O percorrido do roteiro xirou arredor das illas de San Simón e San Antón, e estivo ilustrado con explicacións e comentarios relativos ao significado e valor dos espazos visitados que correron a cargo de Álvarez Cáccamo. O autor tivo en consideración o proceso histórico dos acontecementos que foron acontecendo en ambas illas desde a Idade Media, coa a presenza simbólica do poeta Mendiño e a súa cantiga, a vida monacal, as invasións de Drake, a instalación do lazareto, o uso do recinto como campo de concentración durante a guerra civil e a inmediata posguerra e a súa utilización posterior con diversas finalidades ata hoxe. Neste sentido, Xosé Leal sinalou que "entendemos que o espírito cultural destas visitas vai facer que as persoas que participades poidades gozar dunha nova visión deste espazo a través da perspectiva dun literato". Marta Dacosta explicou ademais que a escolla de Xosé María Álvarez Cáccamo obedeceu, dunha banda, a que "é un poeta de dilatada traxectoria, con amplo recoñecemento e numerosos premios", e por outra, a que "partimos da súa obra O caderno da ira, porque ira é o aínda seguimos sentindo hoxe canto temos que seguir reclamando e loitando para que se recoñeza e se cumpra a Lei de Memoria Histórica".
Ao longo do mes de setembro e comezos de outubro organízanse catro roteiros máis por diversas comarcas da provincia, froito dunha colaboración do ente provincial e a AELG. A este respecto, o deputado de Cultura e Lingua, Xosé Leal, manifestou que " esta iniciativa supón unha nova colaboración coa Asociación de Escritoras e Escritores en Lingua Galega, que se suma a outras xa realizadas neste ano, e coas que intentamos avanzar na posta en valor do sistema literario na lingua que nos é propia".
O seguinte roteiro terá lugar en Tui, o sábado 16 de setembro, e leva por título ‘Monte Aloia. Roteiro Aloia máxico, mítico e lendario'. Estará guiado por Vítor Vaqueiro, que fará un percorrido polos mitos e lendas dese enclave. O sábado 23 de setembro en Cangas será a quenda para o ‘Roteiro do patrimonio da cultura mariñeira na literatura de Bernardino Graña, que estará guiado por Héitor Mera. O cuarto dos percorridos, que terá lugar en Cambados o sábado 30, leva por título ‘Roteiro do Centenario Da terra asoballada'. Estará guiado por Ramón Caride Ogando e centrarase na pegada de Cabanillas en lugares significativos de Cambados. E por último, o sábado 7 de outubro, a parroquia estradense de Berres acollerá ‘Roteiro Avelina Valladares, unha muller do tempo dos Precursores', a cargo do autor Xosé Luna Sanmartín.