A Deputación destina ao concello de Caldas de Reis preto de 50.000 euros para a rehabilitación dunha praza na parroquia de Santa María de Godos

Con estas achegas, o Goberno de Carmela Silva xa aprobou o 87,6 % do orzamento para Caldas de Reis ao abeiro do Plan Concellos 2017

A Deputación de Pontevedra acaba de aprobar, mediante Resolución presidencial, un novo investimento para o Concello de Caldas de Reis ao abeiro da liña 1 do Plan Concellos 2017. Así, a institución provincial achega 49.961 euros que permitirán a rehabilitación dunha praza na parroquia de Santa María de Godos.

A esta última achega hai que sumarlle as concedidas anteriormente pola Deputación de Pontevedra á vila de Caldas de Reis dentro do Plan Concellos 2017. Deste xeito, Caldas de Reis xa recibira un total de 402.848,68 euros en liña 1 para o saneamento do lugar de Casalderrique, en Carracedo, para que a vila financie a adquisición dunha parcela en Segade de Arriba, para a adquisición doutra parcela para a ampliación do centro ocupacional, para a ampliación do aparcadoiro na Finca da Tafona e o acondicionamento de beirarrúas de formigón na pista de pádel, para financiar melloras nos pavimentos dos camiños de Soutelo de Abaixo, Pazo e Canle e para levar a cabo obras de mellora nas dependencias municipais; todas elas a través da liña 1. Así mesmo, a vila tamén recibiu 156.495,17 euros a través da liña 3, para a contratación de 10 persoas nos distintos servizos municipais.

Deste xeito, a vila de Caldas de Reis xa leva aprobados 609.304,85 euros, o que supón un 87,6 % do total previsto dentro do Plan Concellos 2017. Este ano Caldas de Reis recibiu un 16,62 % máis do que percibiu a través do Plan Concellos 2016.