A Deputación de Pontevedra destina máis de 40.000 euros a Vila de Cruces a través do "Plan Concellos 2017"
A institución provincial leva entregado preto de medio millón de euros o que supón o 76,75 % do total destinado ao concello dezano
A Deputación de Pontevedra acaba de aprobar, a través dunha Resolución presidencial, unha nova achega ao municipio de Vila de Cruces no marco do "Plan Concellos 2017", dentro da súa liña 1 de Investimentos. Nesta ocasión, a institución provincial achegará a cantidade de 41.731,45 euros para o acondicionamento dun camiño no lugar da Senra, na parroquia de Toiriz.
Ao longo deste 2017 a Deputación de Pontevedra xa destinou a Vila de Cruces outras achegas ao abeiro do Plan Concellos, 59.700 euros para a mellora do camiño de Vilariño a Beuvas, 35.778,37 euros para un muro de contención en Carbia e para a mellora de camiños en Losón e Bodaño, 125.974,24 euros para a construción de panteóns no cemiterio municipal, 96.663,20 euros para o pago de gasto corrente novo e 134.770,60 euros para a contratación de 11 traballadoras e traballadores nos diferentes servizos municipais da vila.
Deste xeito, e incluíndo esta última achega, Vila de Cruces xa ten recibido da institución provincial o total do investimento que lle corresponde a este municipio dentro do "Plan Concellos 2017", isto é 494.617.86 euros, é dicir un 76,75 % dun total de case 650.000 euros.
