A Deputación de Pontevedra destina á Cañiza unha nova achega do Plan Concellos por 20.000 euros
Con este novo investimento o Goberno de Carmela Silva financiará a compra e colocación de luminarias no parque central da vila
O deputado provincial Carlos Font informou hoxe da aprobación, mediante unha Resolución presidencial, dunha nova achega no concello da Cañiza ao abeiro do Plan Concellos 2018. Trátase dunha axuda de 20.000 euros cos que poderán colocar luminarias no parque central da vila
Ademais desta cantidade, o Goberno provincial ao través do Plan Concellos xa adxudicou anteriormente varias axudas para o municipio. En concreto, 76.643,43 euros para a urbanización do parque central da vila; 71.069,37 euros para a humanización da praza de Valeixe; 60.000 euros para a adquisición dun vehículo compactador de residuos sólidos urbanos; 20.499,99 euros para a ampliación e mellora das instalacións deportivas do ximnasio municipal e 119.613 para o saneamento en Foxo, Valeixe.
Ademais, a Deputación de Pontevedra adxudicou 51.598,69 euros no que corresponde á liña 2 e tamén outros 122.361,75 euros que foron destinados á financiación da contratación de 18 traballadoras e traballadores que están a desempeñar funcións no concello, dentro da liña 3 de Emprego.
A Deputación destina este ano á Cañiza, ao través do Plan Concellos, un total de 928.630,06 euros, un 74,91 % máis que en 2017.
