A Deputación de Pontevedra destina á Cañiza máis de 100.000 euros para a execución de tres novas actuacións na vila
Con este investimento, o Goberno de Carmela Silva vai financiar as obras de pavimentación en diversos camiños da vila e o acondicionamento de accesos e espazos públicos
O deputado de Cooperación, Carlos Font informou hoxe da aprobación, mediante resolucións presidenciais, de tres novos investimentos no Concello da Cañiza por un valor total de 103.020,60 euros ao abeiro da Liña 1 do Plan Concellos da Deputación de Pontevedra. Trátase, nesta quenda, dunha axuda de 41.837,42 euros para financiar a mellora de camiños municipais en Franqueira, Parada e Luneda; tamén outros 41.182,81 euros para o acondicionamento de accesos a Deva e Igrexavella, en Petán; e outra achega de 20.000,37 euros destinados ao acondicionamento da zona recreativa de Xunqueiras. Este ano o Goberno de Carmela Silva pon á disposición da Cañiza a través do Plan Concellos 2019 un total de 559.742,57 euros, o que supón un 3,29 % máis que no exercicio anterior.
Ademais das achegas correspondentes á Liña 1, que son este ano de 386.843,83 euros, o Concello da Cañiza tamén ten á súa disposición polo Plan Concellos 2019 un total de 50.140,63 euros na Liña 2 de amortizacións e débedas. Así mesmo, outros 122.758,11 euros da Liña 3 de emprego cos que o Concello pode financiar a contratación de 16 traballadoras e traballadores para o concello.
Neste novo ano 2019, no total da provincia, a Deputación de Pontevedra pon á disposición dos 59 municipios ao través do Plan Concellos case 43 millóns e medio de euros, o que supón un 3,3 % máis que no exercicio do 2018.
