A Deputación aproba unha nova axuda de 120.000 € a Mos para a substitución do céspede do campo de fútbol de Coto-Torrón ao abeiro do Plan Concellos 2017
Mos recibe este ano do plan un 6 % máis que en 2016, tres puntos por riba da media provincial
A Xunta de Goberno da Deputación de Pontevedra acaba de aprobar unha nova partida cercana aos 120.000 euros para Mos ao abeiro da liña 1 do Plan Concellos 2017 destinada á acondicionar o campo de fútbol de Coto-Torrón. A presidenta Carmela Silva quixo insitir na importancia destas axudas provinciais que permiten "garantir as mellores condicións de servizos básicos para a cidadanía, como neste caso as instalacións deportivas".
En concreto, a axuda de 119.981,89 € permitirá a substitución do céspede artificial da pista deportiva por un novo. Así, nestes primeiros catro meses do ano, a institución provincial leva aprobados 613.188,21 € para esta localidade no marco do Plan Concellos 2017, é dicir, xa se repartiu un 65,28 % dos máis de 900.000 € previstos para Mos neste curso. Esta partida incrementouse en case un 6 % con respecto ano anterior, tres puntos por riba da media provincial.
Carmela Silva sinalou tamén que a liña 1 do Plan Concellos, destinada a investimentos, permite que os concellos da provincia leven a cabo investimentos para dotalos de infraestruturas, en moitas ocasións básicas, e garantir a calidade de vida das veciñas e veciños dos concellos da nosa provincia".
As axudas aprobadas ata a data pola Deputación de Pontevedra dentro da liña 1 do Plan Concellos 2017 ascenden a un total de 5.165.818,69 €, isto supón un 20,06 % do destinado a investimentos. Esta é a liña con maior dotación económica do programa e supón o 62,5 % do total do plan, cun orzamento de 25.750.000 € (fronte aos 25 millóns de 2016).
O Plan Concellos 2017 ten asignado para este curso unha dotación de 41,2 millóns de euros, unha partida un 3 % maior que a aprobada no ano anterior e que entre as súas tres liñas estratéxicas leva aprobado un total de 16,3 millóns de euros desde xaneiro.
