A campaña de igualdade da Deputación estará nas festas patronais de Cuntis
O material da iniciativa "Lembra! Eu decido, ti respectas" estará na Casa da Cultura desde mañá xoves ata o domingo
A Deputación de Pontevedra, a través do Servizo de Igualdade, estará presente durante toda a semana nas Festas Patronais de Santa María, en Cuntis, nas que se agarda a asistencia de numerosas persoas.
A semana grande de Cuntis contará deste xeito cun punto morado de información sobre as violencias machistas e do material institucional das campañas "Lembra! Eu decido, ti respectas", dirixidas tanto a mozas coma a mozos. Estará situado, en horario de 18:00 a 20:00 horas, na Casa da Cultura Roberto Blanco Torres desde mañá xoves ata o próximo domingo.
O obxectivo volve ser o de concienciar a poboación máis nova da importancia das relacións en igualdade e, con este fin, repartiranse elementos explicativos nos que se mostran con claridade os límites ante posibles agresións, facendo fincapé en que son un delito e recalcando a negativa a calquera intento de culpar as vítimas.
O programa das festas de Cuntis inclúe actividades tan variadas coma unha carreira de rolos por equipos mixtos, actividades acuáticas, unha festa da bicicleta e diversas propostas para todos os públicos, sen esquecer os concertos e as tradicionais verbenas.
A campaña "Lembra! Eu decido, ti respectas" iniciouse o verán pasado en todos os festivais #RíasBaixasFests e, posteriormente, a institución provincial ofrecéullela aos concellos que a soliciten para todo tipo de eventos multitudinarios.
