O abismo sitúase espacial e emocionalmente presentándose como un termo de distanciamento, de oposición e mesmo de perigo. Mostrándose como un vertixinoso punto desde o que desequilibrarse e caer ao incomprensible e inabarcable. Exhibíndose como unha paisaxe ambigua e inestable.

Fronte a este abismo, un corpo, que é observado desde unha mirada fragmentada e incompleta, pero que mostra estabilidade, rixidez e forza. Un corpo activo e consciente das súas posibilidades como medio artístico, que se presenta como materia, espazo e obxecto de expresión.

Curriculo

Doutora en Belas Artes, con mención internacional e cualificación de cum laude, pola Universidade de Vigo, ampliou a súa formación académica co Máster de Arte, Museoloxía e Crítica Contemporánea da Universidade de Santiago de Compostela.

Foi galardoada con numerosos premios e recoñecementos, entre os que destaca a obtención da bolsa de estudos do certame Novos Valores 2016, outorgada pola Deputación de Pontevedra este mesmo ano. Ademais, varias das súas obras foron seleccionadas e presentadas en numerosas exposicións, como Proyectos inacabados 25 años. Una facultad en la maleta (Pavilhão de Exposições da Faculdade de Belas Artes, Universidade do Porto, Portugal, 2016), La razón salvaje (Aire Centro de Arte, Santiago de Compostela 2015, 8.º Premio Auditorio de Galicia para Novos Artistas de Santiago de Compostela, 2014), Piel y Silencio (Galería Metro, Santiago de Compostela, 2014), Dressed (realizada para a Fashion Week, O Porto, Portugal, 2011), entre outras.