Son Sara Vila Alonso, nacín nas Neves en 1989 e escribo información local no Diario de Pontevedra desde 2011.

Como sempre me gustou escoitar e contar historias, licencieime en Xornalismo na Universidade de Santiago de Compostela. Durante a miña formación como xornalista, realicei prácticas na delegación de Vigo de La Voz de Galicia, na de Santiago de Compostela de El País e na redacción comarcal de Faro de Vigo para O Condado.

O que máis me gusta do meu traballo é coñecer moitas persoas diferentes que me dan infinitas perspectivas para comprender o mundo no que vivimos sen saír da cidade na que habito. Ademais, o xornalismo permitiume coñecer outras realidades cunha viaxe a zonas rurais e industriais de Marrocos coa Asociación Galega de Reporteiros Solidarios (Agareso), onde descubrín as historias das mulleres que traballan na Zona Franca de Tánxer en fábricas que cosen para xigantes da industria téxtil.

Por outra banda, en 2016 gañei o primeiro premio do Certame de Relatos Curtos Os Viadutos, do Concello de Redondela, e en 2019 acadei o segundo premio Comunicar en Igualdade, que convoca a Xunta de Galicia, por un artigo de opinión publicado no Diario de Pontevedra.

Foto: Rafa Fariña

Twitter: @vila_sara