"Mulleres en acción. Violencia zero" fai reflexionar ao alumnado do CEP Altamira de Salceda coa performance de Begoña Cuquejo
A presidenta da Deputación de Pontevedra, Carmela Silva, pediu acabar cos estereotipos de xénero para así poder construír unha sociedade mellor
A presidenta de Deputación de Pontevedra, Carmela Silva, acompañada polo alcalde de Salceda de Caselas, Marcos Besada, asistiu no auditorio municipal do concello de Salceda de Caselas a unha nova intervención artística de "Mulleres en acción. Violencia zero", unha iniciativa da Deputación de Pontevedra que ten por obxectivo darlle visibilidade á loita contra a violencia machista.
Nesta ocasión a protagonista do acto foi a recoñecida artista galega Begoña Cuquejo. Antes da súa actuación, a presidenta da Deputación de Pontevedra subliñou a importancia que ten "Mulleres en acción. Violencia zero" para a institución provincial, afirmando que "as administracións públicas temos que traballar para construír unha sociedade mellor onde a xente poida ser feliz. E para ser felices temos que vivir en espazos de igualdade respectando os dereitos de todos e todas."
A obra de Begoña Cuquejo, na que participaron 9 mulleres ante máis dun centenar de alumnos e alumnas do CEP Altamira, tratou a violencia estrutural exercida sobre as mulleres a través da figura popular de Madonna e a súa imaxe, e das imposicións sociais que afectan ás mulleres. Con esta peza, titulada Madonna, faite vella con nós, por favor!, as protagonistas reivindicaron a inmensa variedade de mulleres diferentes, de corpos e de movementos, que están encadrados nunha idea de xénero determinada.
Ao inicio do acto, Carmela Silva tivo un recordo para as persoas afectadas polos incendios da pasada fin de semana, explicando que "o pasado luns as mulleres de Salceda de Caselas que hoxe participan neste evento non puideron ensaiar porque estaba loitando contra o lume. Desde aquí o meu recoñecemento a todos os veciños e veciñas de Salceda de Caselas."
En canto ao fondo da obra, a presidenta da institución provincial engadiu que "para acadar un verdadeiro cambio tamén temos que conseguir que as mulleres e os homes poidan adicarse ao que realmente queren e acabar cos estereotipos que nos din que os homes teñen que ser valentes e fortes, adicarse a enxeñería, ser bombeiros... mentres que as nenas se lles di que teñen que adicarse ao coidado das persoas, ser doces, tranquilas..." Carmela Silva engadiu que cando este cambio se produza todos e todas seremos máis felices e tamén que este cambio é urxente, posto que "a desigualdade leva en moitas ocasións a que as mulleres sexan maltratadas e nalgúns casos, desgraciadamente, a que sexan asasinadas. Neste 2016 xa levamos 47 asasinatos e isto non o podemos consentir."
"Mulleres en acción. Violencia zero", que reúne o traballo de 25 artistas especializadas en diferentes modalidades, tras o seu paso por Salceda de Caselas terá como seguinte parada o concello de Vila de Cruces o martes 24 de outubro.
