Xosé Leal: "A cultura ten que ser un sector puxante que xere traballo e tamén ledicia na xente"
O deputado de Cultura e Lingua sinalou que durante a celebración do Culturgal "o público poderá gozar da marabillosa oferta que teñen as empresas do país"
"A Cultura ten que ser un sector puxante que xere traballo e tamén ledicia na xente". Así o manifestou o deputado de Cultura, Xosé Leal, na presentación da Feira das Industrias Culturais, Culturgal, que se celebrará en Pontevedra a primeiros de decembro. Leal definiu o certame como "un fito que se debe repetir moitos anos máis", xa que cumpre un importante papel tanto na faceta profesional, ao reunir empresas e creadores entre si, como tamén de cara ao público, "que poderá gozar da marabillosa oferta que teñen as empresas culturais do país".
Leal salientou que cada ano é máis gustoso asistir ás presentacións do Culturgal ao ver o número de empresas que participan, que demostran que Galiza "ten unha industria potente" que desenvolver, consolidar e facer medrar. Subliñou, así mesmo, a importancia de que dende o ámbito institucional haxa unha clara aposta por iniciativas conxuntas deste calado que sirvan de plataforma ao sector. "O Culturgal é un proxecto colaborativo no que as institucións deben ser parte activa, tal e como o estamos sendo o Concello de Pontevedra, a Xunta a través de Agadic, e a Deputación de Pontevedra", dixo, para engadir que "dende a Deputación seguiremos apostando polo Culturgal e agardamos que o décimo aniversario que se aveciña para o ano próximo sexa espectacular".
En canto á participación da Deputación na feira, Leal explicou que haberá un espazo propio no que a institución provincial dará voz ás iniciativas culturais dos concellos da provincia. Ademais, o departamento de Cultura patrocinará a exposición ‘Pegadas na terra. Diálogos creativos contemporáneos coa natureza e o territorio', que estará aberta dende o inicio da feira ata o mes de xaneiro, dando continuidade á programación.
"Vaise traer a natureza ao interior do Pazo da Cultura cunha mostra na que participan 18 artistas que van facer as súas interpretacións do espazo e o territorio. Cada un ten a súa visión en diferentes expresións artísticas que van dende a escultura, fotografía, vídeo, debuxo… unha multitude de fórmulas para interpretar o espazo natural. O introducir un espazo artístico diferenciado é unha aposta que dende a Deputación levamos facendo xa nas anteriores edicións de Cultural que nos parece positiva", explicou.
Leal destacou que no desenvolvemento da exposición o Museo de Pontevedra colabora xunto aos comisarios, Antón Sobral e Paula Cabaleiro, "que sempre fan un traballo moi interesante". "Esta mostra vai ser moi do gusto dos que se acheguen", finalizou.