Últimos días para a presentación de candidaturas á segunda edición dos Premios Provinciais á Xuventude
A convocatoria conta con sete categorías e 22.000 euros en premios, 1.000 máis que na primeira edición, para mozas e mozos dos 16 aos 35 anos
O luns 7 de maio será o último día para poder presentar traballos á segunda edición dos Premios Provinciais á Xuventude, postos en marcha pola Deputación de Pontevedra e destinados aos mozos e mozas de entre 16 e 35 anos. Nesta ocasión, os premios teñen unha dotación de 22.000 € (1.000 euros máis que na primeira convocatoria) e o seu obxectivo é o de promover o talento e o potencial da xuventude da provincia de Pontevedra.
Estas son as sete categorías ás que poden optar as persoas interesadas: iniciativa social (con tres premios), iniciativa empresarial (con tres premios), blogs (con tres premios), educación en valores (con tres premios), traballo musical (con tres premios), traballo literario breve (que conta con dous premios para narrativa e outros dous para poesía) e, por último, fotografía orixinal (con tres premios).
Todas estas categorías teñen unha partida de 3.000 €, que se distribúen entre 1.500 € ao primeiro premio, 1.000 € ao segundo e 500 euros para o terceiro, agás a de traballo literario. Esta categoría conta cun orzamento de 4.000 euros e os seus galardóns distribúense entre un primeiro premio de 1.500 euros e un segundo de 500 € tanto para os traballos narrativos como para os de poesía.
