Silva e Lores asinan un convenio por valor de medio millón de euros para actividades artísticas, culturais e de promoción de Pontevedra
O convenio, enmarcado no protocolo entre Deputación e Concello, permitirá poñer en marcha actividades relacionadas co cinema, a literatura, o deseño e a música
A presidenta da Deputación de Pontevedra, Carmela Silva, e o alcalde de Pontevedra, Miguel Anxo Fernández Lores, xunto ao vicepresidente da institución provincial, César Mosquera, asinaron o convenio, por valor de 471.675,29 euros, para a posta en marcha de actividades artísticas, culturais e de promoción da cidade. Neste eido, a presidenta provincial destacou que "Pontevedra é unha referencia en mobilidade pero tamén se cualifica a si mesma como un referente no mundo cultural. Para min é un pracer asinar convenios como este, que ten que ver con actividades culturais e, polo tanto, con construír cidades para as persoas".
Máis polo miúdo, o convenio asinado esta mañá ten por obxectivos o desenvolvemento de actividades culturais, artísticas e de lecer durante os anos 2018 e 2019. En concreto, proxectos culturais relacionados co cinema, literatura, deseño e música como Urbtopias, Experimenta e acción, Murais María Victoria Moreno, Surfing The Lérez, Sete Falares, Novos Cinemas, Paseantes, Itineranta, Festa dos Libros, Cabos Soltos, Aña Urbana ou Pontevedra: unha cidade no século XXI.
Segundo informou Carmela Silva o convenio xorde "do acordo asinado ao inicio deste Goberno provincial a través do cal coas cidades de Pontevedra e Vigo achegaríamos financiamento a través de convenios específicos baseados no respecto á autonomía municipal". Deste xeito, ata o momento están xa asinados convenios para obras de mellora en estradas municipais da cidade; para o saneamento da parroquia de Mourente, do Gafos e de Bora; para a posta en marcha de herba sintética nos campos de fútbol de Cerponzóns e Santa María de Xeve; a mellora do acceso a Monte Porreiro e a Príncipe Felipe; a ronda leste; a posta en marcha do centro social do Burgo; ou os campos de fútbol de Campañó e Ponte Sampaio.
Neste aspecto do respecto pola autonomía municipal dos concellos tamén incidiu o vicepresidente provincial, César Mosquera. Ademais, o vicepresidente aproveitou a ocasión para enxalzar as actuacións que o goberno de Pontevedra está a poñer en marcha cos fondos públicos achegados pola institución provincial.
Pola súa banda, o alcalde de Pontevedra destacou o "investimento moi potente" da Deputación de Pontevedra na cidade. No caso concreto do convenio, Lores resaltou a importancia para o goberno local "da recuperación do espazo público e da actividade económica, pero tamén a firme aposta pola cultura, o cinema, a música ou o teatro que fan que Pontevedra sexa un referente e sempre teña actividades para ver, escoitar e participar".
Tanto a presidenta da Deputación como o alcalde de Pontevedra destacaron a facilidade de entendemento e diálogo existente para poñer en marcha proxectos conxuntos. Neste eido, ambos adiantaron actuacións de cara ao futuro pendentes de poñer en marcha na cidade como son as vías perimetrais de Montecelo, o despregamento dos composteiros individuais nas parroquias ou colaboracións no eido deportivo.
